حیدرآباد ،18 ۔اکتوبر۔(ہ س)۔ تلنگانہ کے ڈی جی پی بی شیوادر ریڈی نے نظام آباد سی سی ایس سے منسلک کانسٹیبل ای پرمود کے بزدلانہ قتل کا سخت نوٹ لیا۔ڈی جی پی نے ایماندار اور فرض شناس کانسٹیبل کے قتل پر گہرا دکھ اور افسوس ظاہر کیا۔انہوں نے نظام آباد پولیس کمشنر کو ہدایت دی کہ وہ ملزم شیخ ریاض،جو گاڑیوں کی چوری اورسونے کی چین چھیننے کے جرائم میں ملوث ایک عادی مجرم ہے، کو گرفتار کرنے کے لئے خصوصی ٹیمیں تشکیل دے۔ ریاض نے کانسٹیبل کو پولیس اسٹیشن لے جاتے وقت مہلک وار کر کے ہلاک کردیا۔ڈی جی پی ریڈی نے ملٹی زون-1کے آئی جی پی چندر شیکھر ریڈی کو ہدایت دی کہ وہ فوری طور پر جائے وقوعہ پر پہنچیں اور صورتحال پر قریبی نگرانی کریں۔ انہوں نے حکام کو ہدایت دی کہ کانسٹیبل کے ارکان خاندان کو ہر ممکن مدد اور سہارا فراہم کریں۔ڈی جی پی نے مفرورملزم کو جلد از جلد گرفتار کرنے کے تلاشی مہم انجام دینے کی بھی ہدایت دی۔ ڈی جی پی کے دفتر کی جانب سے جاری بیان میں کہا گیا کہ اس واقعہ کی تحقیقات کو اعلیٰ ترجیح کے ساتھ آگے بڑھایا جا رہا ہے اور ذمہ داران کے خلاف سخت کارروائی کی جائے گی۔
ہندوستھان سماچار
ہندوستان سماچار / محمدعبدالخالق