کانگریس امیدوار نوین یادو نے پرچہ نامزدگی داخل کیاحیدرآباد، 18 اکتوبر (ہ س)۔ جوبلی ہلز کے کانگریس امیدوار وی نوین یادو نے آج پرچہ نامزدگی داخل کردیا۔ حامیوں کے ساتھ بڑے جلوس میں نوین یادو ریٹرننگ آفیسر کے دفتر پہنچے۔ وزراء، پونم پربھاکر، اے آئی ایم آئی ایم کے سربراہ اور رکن پارلیمنٹ اسدالدین اویسی، جی ویویک وینکٹ سوامی، سابق رکن راجیہ سبھا وی ہنمنت راؤ، رکن راجیہ سبھا انل کمار یادو، میئرحیدرآباد جی وجیہ لکشمی، سابق رکن پارلیمنٹ محمد اظہرالدین، صدرنشین گرندھالیہ ڈاکٹر ریاض، مہیلا کانگریس حبیبہ سلطانہ، کارپوریٹر سی این ریڈی اور سنگیتا یادو اس موقع پر موجود تھے۔ پرچہ کے ادخال کے بعد کارکنوں نے آتش بازی کی اور نوین یادو نے ووٹرس سے ملاقات کی۔ یوسف گوڑہ چیک پوسٹ سے سری نگر کالونی تک جلوس سے ٹریفک میں خلل پڑا۔ شیخ پیٹ تحصیلدار آفس میں ریٹرننگ آفیسرکے روبرونوین یادو نے پرچہ کے دو سیٹ داخل کئے۔ ریٹرننگ آفیسر پی سائی رام نے پرچہ نامزدگی قبول کیا۔ بعد میں میڈیا سے بات کرتے ہوئے پونم پربھاکر نے نوین یادوکی کامیابی کو یقینی قراردیا۔ انہوں نے کہا کہ حکومت کی فلاحی اور ترقیاتی اسکیمات سے عوام مطمئن ہیں۔

ہندوستھان سماچار

ہندوستان سماچار / محمدعبدالخالق