حیدرآباد , 17 ۔ اکتوبر۔ (ہ س) ۔

بی آرایس پارٹی نے 18 اکتوبر کومنعقد ہونے والے بی سی طبقات کے بندمیں حصہ لینے کا اعلان کیا ہے۔ تلنگانہ بھون میں آج ایک پریس کانفرنس سے خطاب کرتے ہوئے سابق وزیرسرینواس یادو نے یہ بات بتائی ۔سابق وزراء سرینواس گوڑ ،جی کملاکر کے علاوہ دوسرے بھی اس موقع پرموجود تھے ۔ سرینواس یادو نے کہا کہ بی سی تحفظات کے معاملہ میں کانگریس پارٹی سیاسی مفادات کی خاطر ڈرامہ بازی کرتے ہوئے بی سی طبقات کے جذبات کو ٹھیس پہنچارہی ہے جس کی وجہ سے بی آر ایس پارٹی نے 18 اکتوبرکو بی سی تنظیموں کی جانب سے منظم کئے جانے والے تلنگانہ بند کی مکمل تائیداور حمایت کرنے کا فیصلہ کیا ہے۔ انہوں نے کہا کہ پارٹی کے تمام قائدین ریاست بھر میں احتجاجی مظاہروں میں شامل رہیں گے تاکہ بی سی طبقات کو ان کے جائز حقوق حاصل ہوسکیں اورساتھ ہی ریاستی ومرکزی حکومت پردباؤبنایا جاسکے۔ سرینواس یادو نے کہا کہ کانگریس حکومت کی جانب سے جب اسمبلی میں بل پیش کی گئی تھی، اس وقت بی آر ایس پارٹی نے بل کے نقائص سے واقف کرایا تھا لیکن حکومت نے عجلت پسندی میں بل کو منظور کرایا ہے جس کی وجہ سے عدلیہ نے جی او پر حکم التواء جاری کیا ہے۔ سرینواس گوڑ نے کہا کہ کانگریس پارٹی صرف مقامی اداروں کے انتخابات میں سیاسی فائدہ حاصل کرنے کیلئے بی سی تحفظات کا تماشہ کر رہی ہے۔ راج بھون کو قرارداد پہنچنے سے قبل دہلی میں دھرنا کیا گیا جس میں کانگریس کے اہم قائدین ملکارجن کھرگے ،راہل گاندھی ،پرینکا گاندھی کے علاوہ دوسرے اہم قائدین نے شرکت نہیں کی۔ اس سے اندازہ ہوتا ہے کہ کانگریس پارٹی بی سی تحفظات کے معاملہ میں سنجیدہ نہیں ہے۔ہندوستھان سماچار

ہندوستان سماچار / محمدعبدالخالق