نئی دہلی، 13 اکتوبر (ہ س): دہلی پولیس اور نیشنل ڈیزاسٹر ریسپانس فورس (این ڈی آر ایف) کے درمیان ڈیزاسٹر مینجمنٹ ٹریننگ پر مفاہمت کی یادداشت (ایم او یو) کی تین سال کے لیے تجدید کی گئی تاکہ دارالحکومت میں ڈیزاسٹر مینجمنٹ اور راحتی کارروائیوں کے لیے دہلی پولیس کی صلاحیت کو مزید مضبوط کیا جا سکے۔ اس معاہدے پر دہلی پولیس ہیڈکوارٹر میں دستخط کیے گئے۔

پولیس ہیڈکوارٹر سے موصولہ اطلاع کے مطابق دہلی پولیس کمشنر ستیش گولچہ کی موجودگی میں ایک تقریب کے دوران اسپیشل کمشنر آف پولیس (ٹریننگ) سنجے کمار اور انسپکٹر جنرل (آئی جی) این ڈی آر ایف نریندر سنگھ بندیلا نے اس معاہدے پر دستخط کئے۔ اس معاہدے کا مقصد دہلی پولیس کے افسران اور اہلکاروں کو ڈیزاسٹر مینجمنٹ، ریسکیو آپریشنز، سی پی آر تکنیک، کمیونٹی ڈیزاسٹر مینجمنٹ، اور واقعہ کے ردعمل کے نظام جیسے مضامین میں خصوصی تربیت فراہم کرنا ہے۔

کمشنر ستیش گولچہ نے این ڈی آر ایف کے تجربے اور تعاون کی ستائش کرتے ہوئے کہا کہ اس شراکت داری سے دہلی پولیس کو کسی بھی آفت یا ہنگامی صورتحال سے زیادہ مؤثر طریقے سے جواب دینے میں مدد ملے گی۔ انہوں نے مزید کہا کہ یہ تعاون نہ صرف پولیس کی کارکردگی کو بڑھاتا ہے بلکہ دہلی والوں کی حفاظت کو یقینی بنانے کی طرف ایک بڑا قدم ہے۔

اس میمورنڈم کے تحت این ڈی آر ایف کے انسٹرکٹر دہلی پولیس اکیڈمی میں باقاعدگی سے تربیتی سیشن منعقد کرتے ہیں۔ 2022 سے، تقریباً 17,000 پولیس اہلکار اس پروگرام سے مستفید ہو چکے ہیں۔ اس سے ان کی ڈیزاسٹر ریسپانس کی صلاحیتوں اور این ڈی ار ایف کے ساتھ تال میل میں نمایاں بہتری آئی ہے۔

---------------

ہندوستان سماچار / عبدالسلام صدیقی