کولکاتا، 7 ستمبر (ہ س)۔ کولکاتا میں منعقد دو روزہ رائز کانکلیو 2026 کا پیر کے روز اختتام ہو گیا۔ کانکلیو میں سائنس دانوں، محققین، ماہرین تعلیم، صنعتی شعبے کے نمائندوں، کاروباری افراد اور اسٹارٹ اپ سے وابستہ لوگوں نے شرکت کی۔ پروگرام کا مقصد تحقیق، اختراع، ٹیکنالوجی کی کمرشلائزیشن اور نئے کاروباری اداروں کے قیام کے درمیان مضبوط تعلق قائم کرنا تھا۔

کانکلیو کے چھٹے ایڈیشن کا افتتاح 6 ستمبر کو کونسل آف سائنٹیفک اینڈ انڈسٹریل ریسرچ (سی ایس آئی آر) کے نائب صدر اور وزارتِ سائنس و ٹیکنالوجی و وزارتِ ارضیاتی علوم کے مرکزی وزیر مملکت (آزادانہ چارج) ڈاکٹر جتیندر سنگھ نے کیا تھا۔ انہوں نے لیبارٹریوں میں تیار کی جانے والی دیسی ٹیکنالوجیز کو بازار تک پہنچانے کے عمل کو مزید مضبوط کرنے کی ضرورت پر زور دیا۔

افتتاحی پروگرام کے دوران مختلف سہولیات کا افتتاح، ٹیکنالوجی کی منتقلی اور مفاہمت کی یادداشتوں پر دستخط کیے گئے۔ اس کے ساتھ کئی اہم دستاویزات اور مجموعے بھی جاری کیے گئے۔ کانکلیو میں مجموعی طور پر آٹھ مفاہمت کی یادداشتوں پر دستخط، چار ٹیکنالوجیز کی منتقلی، دو مصنوعات کا اجرا اور ایک سہولت کا افتتاح کیا گیا۔

دوسرے دن چار مباحثوں اور ایک خصوصی لیکچر کا انعقاد کیا گیا۔ ان میں اہم معدنیات اور نئے مواد، سائنس کمیونیکیشن، سائنس پر مبنی اسٹارٹ اپ، مینوفیکچرنگ ٹیکنالوجی، روایتی علم اور جدید اختراع جیسے موضوعات پر گفتگو ہوئی۔ مباحثوں میں این ٹی پی سی مائننگ لمیٹڈ، ہندوستان کاپر لمیٹڈ، انجینئرز انڈیا لمیٹڈ، کونسل آن انرجی، انوائرمنٹ اینڈ واٹر، آل انڈیا ریڈیو، ایمامی لمیٹڈ، ٹی سی جی کریسٹ، ہما دری اسپیشلٹی کیمیکل لمیٹڈ، آئی کین نینو، ماسوجا ٹیکنو سولیوشن، ویریانہب، پتنجلی ریسرچ فاؤنڈیشن، جادھوپور یونیورسٹی، ہمالیہ ویلنس کمپنی اور لوریئل انڈیا سمیت مختلف اداروں اور کمپنیوں کے ماہرین نے شرکت کی۔

خصوصی لیکچر کا موضوع ’دی لیب-ٹو-مارکیٹ لیپ‘ تھا۔ اس میں لیبارٹریوں میں تیار ہونے والی اہم تحقیق اور دریافتوں کو بازار پر مبنی کاروباری اداروں میں تبدیل کرنے کے امکانات پر گفتگو کی گئی۔

اختتامی تقریب میں مغربی بنگال حکومت کے سائنس و ٹیکنالوجی و بایوٹیکنالوجی، انفارمیشن ٹیکنالوجی و الیکٹرانکس اور فوڈ پروسیسنگ انڈسٹریز و ہارٹیکلچر محکموں کے انچارج کابینی وزیر ڈاکٹر کلیان چکرورتی نے تحقیق، صنعت، حکومت، تحقیقی اداروں، اسٹارٹ اپس اور کاروباری شعبے کے درمیان بہتر تال میل قائم کرنے میں رائز کے کردار کو اجاگر کیا۔

انہوں نے تحقیق سے اختراع اور اختراع سے کاروبار تک کے سفر کو مضبوط بنانے کی ضرورت بتائی۔ ساتھ ہی خود انحصاری، ترقی یافتہ بھارت اور ترقی یافتہ مغربی بنگال کے ہدف کو حاصل کرنے میں سائنس و ٹیکنالوجی کے اہم کردار پر زور دیا۔

پروگرام کے اختتام پر سی ایس آئی آر-سی جی سی آر آئی، کولکاتا کے ڈائریکٹر پروفیسر بِکرَم جیت باسو نے اظہارِ تشکر کیا۔ سی ایس آئی آر-سی ایم ای آر آئی، درگاپور کے ڈائریکٹر ڈاکٹر نریش چندر مرمو اور سی ایس آئی آر-آئی آئی سی بی، کولکاتا کی ڈائریکٹر پروفیسر وبھا ٹنڈن نے بھی پروگرام میں اپنا تعاون پیش کیا۔

رائز کانکلیو 2026 نے تحقیقی اداروں، صنعت، اسٹارٹ اپس، کاروباری افراد اور پالیسی سازوں کے درمیان مسلسل مکالمے اور تعاون کے لیے ایک مشترکہ پلیٹ فارم فراہم کیا۔ اس کا مقصد بھارت کی سائنسی صلاحیتوں کو ٹیکنالوجی، کاروبار اور عملی حل میں تبدیل کرنے کے عمل کو رفتار دینا ہے، تاکہ وکست بھارت 2047 کے ہدف تک پہنچنے میں سائنس اور اختراع کا موثر استعمال کیا جا سکے۔

ہندوستھان سماچار

---------------

ہندوستان سماچار / عبدالواحد