سولن، 05 ستمبر (ہ س)۔ ہماچل پردیش کے سولن شہر کے وسط میں واقع گنج بازار میں جنم اشٹمی کی شام نوجوانوں کے دو گروپوں کے درمیان ہونے والی خونی جھڑپ میں کالکا کے رہائشی ایک نوجوان کی موت ہوگئی۔ پولیس نے فوری کارروائی کرتے ہوئے معاملے میں دو ملزمان کو گرفتار کرلیا ہے۔جمعرات کی دیر رات شراب کے ٹھیکے کے سیلز مین پر ہونے والے جان لیوا حملے کا معاملہ ابھی ٹھنڈا بھی نہیں ہوا تھا کہ جمعہ کو ایک اور خونی جھڑپ نے شہر کی امن و امان کی صورتحال پر سوالات کھڑے کردیے۔
جمعہ کو ایک طرف لوگ جنم اشٹمی کی تقریبات میں مصروف تھے، وہیں شہر کے مصروف ترین علاقے سے ایک دل دہلا دینے والی واردات سامنے آئی۔ نوجوانوں کے دو گروپوں کے درمیان لڑائی کے دوران تیز دھار ہتھیار سے حملہ کیا گیا، جس میں ایک نوجوان شدید زخمی ہوگیا اور اسپتال پہنچتے ہی اس کی موت ہوگئی۔
متوفی کی شناخت کالکا کے رہائشی امَن کے طور پر ہوئی ہے۔ سولن کے پولیس سپرنٹنڈنٹ ٹی۔ سائی دتاتریہ ورما نے بتایا کہ گنج بازار کے مصروف علاقے میں نوجوانوں کے دو گروپوں کے درمیان کسی بات کو لے کر تنازع شروع ہوا تھا۔ دیکھتے ہی دیکھتے معمولی بحث نے خونی تصادم کی شکل اختیار کرلی اور اس دوران تیز دھار ہتھیاروں کا بھی استعمال کیا گیا۔حملے میں کالکا کا رہائشی امن شدید زخمی ہوگیا، جسے علاج کے لیے سولن کے ریجنل اسپتال لے جایا گیا، جہاں ڈاکٹروں نے اسے مردہ قرار دے دیا۔ اس واقعے میں دو دیگر نوجوانوں کے زخمی ہونے کی بھی اطلاع ہے۔
ابتدائی تحقیقات میں سامنے آیا ہے کہ دونوں فریقوں کے درمیان تنازع پہلے ہی شروع ہوچکا تھا۔ معاملہ پولیس تک بھی پہنچا تھا، تاہم اس وقت صورتحال قابو میں آگئی تھی۔ بعد میں دونوں گروپ دوبارہ آمنے سامنے آگئے اور تنازع نے تشدد کی شکل اختیار کرلی۔واقعے کی اطلاع ملتے ہی پولیس ٹیم موقع پر پہنچی اور جائے وقوعہ کا معائنہ کرکے شواہد اکٹھے کیے۔ پولیس نے علاقے میں نصب سی سی ٹی وی کیمروں کی فوٹیج بھی کھنگالنا شروع کردی ہے، تاکہ واقعے کی مکمل کڑی اور اس میں ملوث تمام افراد کے کردار کا تعین کیا جاسکے۔پولیس نے قتل سمیت دیگر سنگین دفعات کے تحت کارروائی شروع کردی ہے۔ سی سی ٹی وی فوٹیج، عینی شاہدین کے بیانات اور دیگر شواہد کی بنیاد پر تفتیش آگے بڑھائی جارہی ہے۔
پولیس سپرنٹنڈنٹ کے مطابق معاملے میں دو ملزمان کو گرفتار کیا گیا ہے، جن کی شناخت انکُش اور منتھن کے طور پر ہوئی ہے۔ پولیس دونوں سے پوچھ گچھ کررہی ہے اور واقعے میں دیگر افراد کے ملوث ہونے کی بھی تحقیقات کی جارہی ہیں۔ پولیس جھگڑے کی اصل وجہ کا بھی پتہ لگانے میں مصروف ہے۔ اس بات کی بھی تفتیش کی جارہی ہے کہ کہیں یہ واقعہ منشیات کے کاروبار سے تو وابستہ نہیں۔
ہندوستھان سماچار
ہندوستان سماچار / Mohammad Khan
