نئی دہلی، 29 ستمبر (ہ س)۔ آیورویدک کلاسیکل فارمولیشنز اور نیوٹراسیوٹیکل سپلیمنٹس بنانے والی کمپنی ہمالیہ نیوٹراویدکس انڈیا کے شیئرز نے آج اسٹاک مارکیٹ میں زبردست شروعات کی اور اپنے آئی پی او سرمایہ کاروں کو منافع دیا۔ آئی پی او کے تحت کمپنی کے شیئرز 106 روپے کی قیمت پر جاری کیے گئے تھے۔ آج بی ایس ای کے ایس ایم ای پلیٹ فارم پر اس کی لسٹنگ 11.32 فیصد پریمیم کے ساتھ 118 روپے کی سطح پر ہوئی۔

مضبوط لسٹنگ کے بعد خریداروں نے خریداری شروع کر دی، جس سے شیئر کی قیمت میں تیزی آ گئی۔ مسلسل خریداری کے باعث یہ شیئر بڑھ کر 123.90 روپے کی اپر سرکٹ سطح تک پہنچ گیا۔ تاہم بعد میں منافع وصولی کے باعث اپر سرکٹ ٹوٹ گیا۔ دن بھر کی خرید و فروخت کے بعد یہ شیئر 120 روپے کی سطح پر بند ہوا۔ اس طرح پہلے دن کے کاروبار میں کمپنی کے آئی پی او سرمایہ کاروں کو فی شیئر 14 روپے یعنی 13.21 فیصد کا فائدہ ہوا۔

اس کمپنی کا 26.50 کروڑ روپے کا آئی پی او 22 سے 24 ستمبر کے درمیان سبسکرپشن کے لیے کھولا گیا تھا۔ اس آئی پی او کو سرمایہ کاروں کی جانب سے اوسط ردعمل ملا تھا، جس کے باعث یہ مجموعی طور پر 2.33 گنا سبسکرائب ہوا۔ اس میں کوالیفائیڈ انسٹی ٹیوشنل بائرز (کیو آئی بی) کے لیے مختص حصہ 100 فیصد (اینکر کے علاوہ) سبسکرائب ہوا تھا۔ اسی طرح نان انسٹی ٹیوشنل انویسٹرز (این آئی آئی) کے لیے مختص حصے میں 3.58 گنا سبسکرپشن ہوا، جبکہ ریٹیل سرمایہ کاروں کے لیے مختص حصہ 2.56 گنا سبسکرائب ہوا۔

اس آئی پی او کے تحت 10 روپے فیس ویلیو والے کل 24,99,600 نئے شیئرز جاری کیے گئے ہیں۔ آئی پی او میں شیئرز کی فروخت سے حاصل ہونے والی رقم کا استعمال کمپنی کاروباری ترقی اور مارکیٹنگ کی سرگرمیوں میں کرے گی۔ اس کے علاوہ اس رقم کو ورکنگ کیپیٹل کی ضروریات پوری کرنے، پرانے قرض کے بوجھ کو کم کرنے، آئی پی او سے متعلق اخراجات کی ادائیگی اور عام کارپوریٹ مقاصد کے لیے بھی استعمال کیا جائے گا۔

ہمالیہ نیوٹراویدکس کی مالی حالت کی بات کریں تو کیپیٹل مارکیٹ ریگولیٹر سیبی کے پاس جمع کرائے گئے ریڈ ہیرنگ پراسپیکٹس (آر ایچ پی) میں کیے گئے دعوے کے مطابق کمپنی کی مالی صحت میں مسلسل بہتری آئی ہے۔ مالی سال 2023تا2024 میں کمپنی کو 43 لاکھ روپے کا خالص منافع ہوا تھا، جو اگلے مالی سال 2024تا2025 میں بڑھ کر 2.23 کروڑ روپے ہو گیا۔ گزشتہ مالی سال 2025تا2026 میں کمپنی کو 7.39 کروڑ روپے کا خالص منافع ہوا تھا۔

ہندوستھان سماچار

---------------

ہندوستان سماچار / عبدالسلام صدیقی