شملہ، 29 ستمبر (ہ س)۔ ہماچل پردیش کے اونچے پہاڑی علاقوں میں پیر کی رات ہوئی بارش اور برفباری کے بعد سردی میں اضافہ ہو گیا ہے۔ چمبا ضلع کے ساچ پاس کے آس پاس تقریباً ایک فٹ تازہ برف گرنے سے راستہ گاڑیوں کی آمد و رفت کے لیے بند ہو گیا ہے۔ انتظامیہ نے لوگوں سے ساچ پاس کی طرف سفر نہ کرنے کی اپیل کی ہے۔ قبائلی اضلاع لاہول اسپیتی اور کنور میں بھی بارش اور برفباری کے بعد سرد لہر جیسی صورتحال پیدا ہو گئی ہے۔ منگل کو ریاست کے زیادہ تر حصوں میں موسم صاف رہا اور دھوپ نکلنے سے لوگوں نے راحت محسوس کی۔ محکمہ موسمیات کے مطابق آج کچھ مقامات پر ہلکی بارش ہو سکتی ہے، جس کے بعد 30 ستمبر سے 5 اکتوبر تک ریاست میں موسم خشک رہنے کا امکان ہے۔ اس دوران جنوب مغربی مانسون کی واپسی کا عمل جاری ہے اور ہماچل سے مانسون کی باضابطہ واپسی کا اعلان ابھی باقی ہے۔

بارش اور برفباری کا اثر منگل کے کم سے کم درجہ حرارت پر بھی نظر آیا۔ ریاست میں کم سے کم درجہ حرارت اوسطاً معمول سے 0.9 ڈگری سیلسیس کم رہا۔ محکمہ موسمیات کے مطابق جنوب مغربی مانسون کی واپسی کی لکیر اس وقت 32.5 ڈگری شمالی عرض البلد اور 72.5 ڈگری مشرقی طول البلد سے گزر رہی ہے۔

اس مانسون میں بارش سے متعلق حادثات میں اب تک ریاست میں 373 افراد کی موت ہو چکی ہے۔ چار افراد لاپتہ ہیں اور 623 افراد زخمی ہوئے ہیں۔ مانسون کے دوران 581 مویشی بھی ہلاک ہوئے ہیں۔ ریاست میں مانسون سے تقریباً 3,220 کروڑ روپے کے نقصان کا اندازہ لگایا گیا ہے۔ اس دوران 146 مکانات مکمل طور پر اور 530 مکانات جزوی طور پر تباہ ہوئے ہیں۔ تعمیرات عامہ کے محکمہ نے سڑکوں اور پلوں کے منہدم ہونے سے تقریباً 2,744 کروڑ روپے کا نقصان ہونے کا اندازہ ہے۔

ہندوستھان سماچار

---------------

ہندوستان سماچار / عبدالواحد