نئی دہلی، 24 ستمبر(ہ س)۔ مرکزی حکومت نے تہواروں کے موسم سے قبل صارفین کو راحت دینے کے لیے اہم خوردنی تیل جیسے سویابین، پام آئل اور سورج مکھی پر درآمدی محصولات میں کمی کی ہے۔ نئی شرحیں 24 ستمبر سے نافذ العمل ہیں۔
سرکاری نوٹیفکیشن کے مطابق خام سورج مکھی کے تیل پر بنیادی کسٹم ڈیوٹی 10 فیصد سے کم کر کے صفر کر دی گئی ہے، جبکہ خام سویابین کے تیل اور خام پام آئل پر بنیادی کسٹم ڈیوٹی (بی سی ڈی) کو 10 فیصد سے کم کر کے 5 فیصد کر دیا گیا ہے۔ اس کے ساتھ، مرکزی حکومت نے خام اور ریفائنڈ خوردنی تیلوں کے درمیان درآمدی ڈیوٹی کے فرق کو 19.25 فیصد برقرار رکھتے ہوئے متعلقہ ریفائنڈ خوردنی تیلوں پر لاگو بی سی ڈی کو کم کر دیا ہے۔
مرکزی حکومت نے گھریلو خوردنی تیل کی قیمتوں پر قابو پانے، صارفین کو راحت فراہم کرنے اور بین الاقوامی خوردنی تیل کی قیمتوں میں تیزی سے اضافے سے پیدا ہونے والے افراط زر کے دباؤ کو کم کرنے کے مقصد سے بڑے درآمد شدہ خام خوردنی تیل پر بنیادی کسٹم ڈیوٹی میں کمی کی ہے۔
حکومت نے خوردنی تیل کی انجمنوں اور صنعت کے اسٹیک ہولڈرز کو بھی ایک ایڈوائزری جاری کی ہے کہ وہ درآمدی ڈیوٹی میں کمی کا پورا فائدہ صارفین تک پہنچائیں۔
صنعت کے اسٹیک ہولڈرز سے درخواست کی گئی ہے کہ وہ لاگت میں کمی کے مطابق قیمت تقسیم کاروں (پی ٹی ڈی) اور زیادہ سے زیادہ خوردہ قیمت (ایم آر پی) پر فوری طور پر نظر ثانی کریں۔ خوردنی تیل کی انجمنوں سے بھی درخواست کی گئی ہے کہ وہ اپنے اراکین کو بغیر کسی تاخیر کے متعلقہ قیمتوں میں کمی کو نافذ کرنے کا مشورہ دیں۔ درآمدی محصولات کو معقول بناتے ہوئے بین الاقوامی خوردنی تیل کی قیمتوں میں اضافے اور اس کے نتیجے میں گھریلو مارکیٹ میں قیمتوں اور خوردہ قیمتوں میں اضافے کو مدنظر رکھا گیا ہے۔
ہندوستھان سماچار
--------
ہندوستان سماچار / عبدالسلام صدیقی
