اجمیر، 20 ستمبر (ہ س)۔

آل انڈیا مجلسِ اتحاد المسلمین (اے آئی ایم آئی ایم) کے قومی ترجمان اور سابق رکنِ اسمبلی وارث پٹھان اتوار کو اجمیر پہنچے، جہاں انہوں نے خواجہ معین الدین حسن چشتی کی درگاہ پر حاضری دی اور مخملی چادر و عقیدت کے پھول پیش کیے۔ انہوں نے ملک میں امن، سکون اور بھائی چارے کے لیے دعا کی۔

اس موقع پر راجستھان اے آئی ایم آئی ایم کے ریاستی صدر جمیل خان، بہار کے قومی ترجمان عادل حسن سمیت پارٹی کے عہدیداران اور کارکنان بھی موجود تھے۔

درگاہ پر حاضری کے بعد میڈیا سے گفتگو کرتے ہوئے وارث پٹھان نے کہا کہ وہ پارٹی کے قومی صدر اسدالدین اویسی اور اے آئی ایم آئی ایم کی جانب سے خواجہ غریب نواز کی بارگاہ میں چادر لے کر پہنچے ہیں۔ انہوں نے کہا کہ دعا کی گئی ہے کہ ملک میں سکون اور بھائی چارہ قائم رہے اور نفرت کے بجائے محبت کا پیغام مضبوط ہو۔

وارث پٹھان نے راجستھان میں حالیہ بلدیاتی انتخابات میں اے آئی ایم آئی ایم کی کارکردگی کا ذکر کرتے ہوئے کہا کہ پارٹی نے چھ میں سے دو نشستوں پر کامیابی حاصل کی ہے۔ راجستھان میں یہ اے آئی ایم آئی ایم کی پہلی انتخابی کامیابی ہے۔

انہوں نے راشٹریہ لوک تانترک پارٹی (آر ایل پی) کے ساتھ اتحاد کا بھی ذکر کیا اور دعویٰ کیا کہ ان کی اتحادی جماعت نے 68 نشستوں پر کامیابی حاصل کی ہے۔

پٹھان نے کہا کہ راجستھان کے بعد اب پارٹی کی توسیع اترپردیش کی جانب بھی ہو رہی ہے۔ اسی تناظر میں انہوں نے کہا، ”راجستھان تو صرف ایک جھلک ہے، پورا اترپردیش ابھی باقی ہے۔“

ہندوستھان سماچار

ہندوستان سماچار / عطاءاللہ