دونوں ممالک کے درمیان تجارتی تعاون مضبوط بنانے کے اقدامات پر اجلاس

نئی دہلی، 2 ستمبر (ہ س)۔

بھارت اور افغانستان کے مشترکہ ورکنگ گروپ نے دونوں ممالک کے درمیان دوطرفہ تجارت اور اقتصادی تعاون کو مزید مضبوط بنانے کے اقدامات کا جائزہ لینے کے لیے ورچوئل میٹنگ کی۔ مشترکہ ورکنگ گروپ کے اجلاس میں تجارت میں سہولت، کسٹمز تعاون، رابطوں اور سرمایہ کاری پر تبادلہ خیال کیا گیا۔

وزارت تجارت و صنعت نے بدھ کو جاری ایک بیان میں بتایا کہ تجارت، کاروبار اور سرمایہ کاری سے متعلق بھارت اور افغانستان کے مشترکہ ورکنگ گروپ (جے ڈبلیو جی) کا اجلاس منگل کو ورچوئل طریقے سے منعقد ہوا۔ اجلاس میں دوطرفہ تجارت اور اقتصادی تعاون کو مضبوط بنانے کے اقدامات کا جائزہ لیا گیا۔ دونوں ممالک نے تجارتی سرگرمیوں کو مزید مضبوط بنانے کے لیے آئندہ کے اقدامات پر اتفاق کیا۔

وزارت کے مطابق اجلاس میں بھارت اور افغانستان کے حکام نے شرکت کی، جن میں تجارت، صنعت، کسٹمز، ریگولیٹری اداروں اور سفارتی مشنز کے نمائندے شامل تھے۔ اجلاس کے دوران دونوں فریقوں نے دوطرفہ تجارت اور اقتصادی تعاون سے متعلق مختلف امور کا جائزہ لیا اور تجارت کو مزید آسان بنانے اور دونوں ممالک کے درمیان تجارتی تعلقات مضبوط کرنے کے اقدامات پر تبادلہ خیال کیا۔

گفتگو میں تجارت میں سہولت اور کسٹمز تعاون، افغان تاجروں کے لیے ویزا میں آسانی، بینکنگ اور مالیاتی تعاون، ادویات اور زرعی تجارت، توانائی تعاون، سرمایہ کاری اور تجارت کے فروغ، ٹیرف میں رعایت، کارگو رابطے اور بندرگاہ سے متعلق امور شامل تھے۔

وزارت تجارت نے کہا کہ دونوں فریق ادارہ جاتی تعاون کو مضبوط بنانے اور نشان زدہ شعبوں میں مزید اقدامات کرنے پر متفق ہوئے۔ ان میں کسٹمز اور ڈیٹا شیئرنگ تعاون میں اضافہ، ادویات اور زراعت کے شعبے میں ریگولیٹری تعاون، تجارتی رابطوں میں بہتری اور سرمایہ کاری کے ساتھ ساتھ کاروباری سطح پر باہمی روابط کو فروغ دینا شامل ہے۔

یہ اجلاس دوستانہ اور تعمیری ماحول میں اختتام پذیر ہوا۔ دونوں فریقوں نے بھارت-افغانستان تجارت، کاروبار اور سرمایہ کاری کے تعلقات کو مزید مضبوط بنانے کے اپنے عزم کا اعادہ کیا اور اہم امور پر مسلسل بات چیت جاری رکھنے پر اتفاق کیا۔

ہندوستھان سماچار

ہندوستان سماچار / عطاءاللہ