ناگویا ، 19 ستمبر (ہ س)۔

جاپان کے ایچی-ناگویا میں 20 ویں ایشیائی کھیلوں کا ہفتہ کے روز باضابطہ طور پر آغاز ہو گیا۔ پالوما میزو ہو اسٹیڈیم میں منعقدہ پروقار افتتاحی تقریب میں ایشیا کے مختلف ممالک سے پہنچے کھلاڑی اور حکام شریک ہوئے۔ جاپان کے شہنشاہ نارو ہیتو نے کھیلوں کے باضابطہ افتتاح کا اعلان کیا۔

افتتاحی تقریب میں ہندوستانی دستے نے پورے جوش و خروش کے ساتھ مارچ پاسٹ کیا۔ دو بار کی اولمپک تمغہ جیتنے والی نشانہ باز منو بھاکر اور اسٹار کبڈی کھلاڑی پون سہراوت ہاتھوں میں ترنگا تھامے ہندوستانی دستے کی قیادت کرتے نظر آئے۔ ان کے پیچھے ہندوستانی کھلاڑیوں نے زبردست جوش کے ساتھ مارچ کیا۔ پون سہراوت کو آخری لمحات میں شاٹ پٹ کھلاڑی تجندر پال سنگھ تور کی جگہ پرچم بردار بنایا گیا۔ تور کو سرکاری کٹ وقت پر نہیں ملنے کے باعث یہ تبدیلی عمل میں لائی گئی۔

ایشیائی کھیلوں کے کچھ مقابلے پہلے ہی شروع ہو چکے ہیں، لیکن ہفتہ کے روز منعقدہ افتتاحی تقریب کے ساتھ ہی کھیلوں کا باضابطہ آغاز ہوا۔ تقریب میں روایتی جاپانی موسیقی اور رقص کے ساتھ جدید پیشکش بھی دیکھنے کو ملیں۔ اس کے بعد مختلف ممالک کے دستوں نے اقوام کی پریڈ میں حصہ لیا۔

ہندوستانی دستے کا داخلہ افتتاحی تقریب کے اہم ترین پرکشش لمحات میں شامل رہا۔ منو بھاکر اور پون سہراوت ترنگا لے کر سب سے آگے رہے۔ منو بھاکر پیرس اولمپکس میں دو کانسے کے تمغے جیت چکی ہیں، جبکہ پون سہراوت 2022 کے ہانگژو ایشیائی کھیلوں میں طلائی تمغہ جیتنے والی ہندوستانی مردوں کی کبڈی ٹیم کا حصہ رہے تھے۔

ایشیائی کھیل 2026 میں ہندوستان کے 503 کھلاڑی 36 کھیلوں میں حصہ لے رہے ہیں۔ ان میں 269 مرد اور 234 خواتین کھلاڑی شامل ہیں۔

ہندوستان نے گزشتہ ایشیائی کھیلوں میں اپنی تاریخ کی بہترین کارکردگی کا مظاہرہ کرتے ہوئے کل 107 تمغے جیتے تھے، جن میں 28 طلائی، 38 چاندی اور 41 کانسے کے تمغے شامل تھے۔ اس بار بھی ہندوستانی دستہ اسی شاندار کارکردگی کو مزید آگے بڑھانے کے عزم کے ساتھ میدان میں اترا ہے۔

ہندوستھان سماچار

---------------

ہندوستان سماچار / انظر حسن