نئی دہلی، 17 ستمبر(ہ س)۔ صحت اور خاندانی بہبود کی مرکزی وزارت نے اسٹیم سیل تھراپی کے ضابطے کے حوالے سے ریاستوں اور مرکز کے زیر انتظام علاقوں کو مشورے جاری کیے ہیں۔ وزارت نے واضح کیا ہے کہ اسٹیم سیل تھراپی کو صرف ان بیماریوں اور حالات میں معمول اور معیاری علاج کے طور پر استعمال کیا جا سکتا ہے جنہیں وزارت نے منظور کیا ہے۔

وزارت کی طرف سے 16 ستمبر کو جاری کردہ ایڈوائزری میں کہا گیا ہے کہ آٹزم اسپیکٹرم ڈس آرڈر (اے ایس ڈی) کے علاج کے لیے اسٹیم سیل تھراپی کی کوئی بھی شکل فی الحال صرف باضابطہ طور پر منظور شدہ کلینیکل ٹرائل کے تحت کی جا سکتی ہے۔ اس کے لیے 2017 کے اسٹیم سیل ریسرچ کے لیے آئی سی ایم آر-ڈی بی ٹی کے قومی رہنما خطوط اور وقتا فوقتا جاری کی جانے والی دیگر حکومتی ہدایات کی تعمیل کی ضرورت ہوگی۔

وزارت صحت نے ریاستوں اور مرکز کے زیر انتظام علاقوں سے کہا ہے کہ وہ سپریم کورٹ کی ہدایات کو تمام متعلقہ ریاستی اور ضلعی ریگولیٹری حکام اور سرکاری اور نجی طبی اداروں تک وسیع پیمانے پر پہنچائیں۔ خاص طور پر، اسٹیم سیل کی تحقیق، علاج، فروغ، یا استعمال میں شامل اداروں کو ان ضوابط کی تعمیل کرنی چاہیے۔

ایڈوائزری میں واضح کیا گیا ہے کہ غیر مصدقہ ا سٹیم سیل تھراپی، بشمول آٹزم کے لیے ا سٹیم سیل علاج، معمول، معیاری یا تجارتی طبی خدمت کے طور پر پیش نہیں کیا جا سکتا۔

یہ ایڈوائزری سپریم کورٹ کے 30 جنوری 2026 کے یش چیریٹیبل ٹرسٹ اور دیگر بمقابلہ یونین آف انڈیا کے فیصلے کے بعد جاری کی گئی ہے۔ عدالت نے قوانین کی عدم تعمیل پر پیشہ ورانہ بدانتظامی سمیت قانونی اور ضابطہ جاتی کارروائی کا مطالبہ کیا تھا۔

وزارت نے کہا کہ قوانین کی خلاف ورزی کے نتیجے میں متعلقہ ڈاکٹروں کے خلاف پیشہ ورانہ بدانتظامی کی کارروائی ہو سکتی ہے۔ اس کے علاوہ، کلینیکل اسٹیبلشمنٹ ایکٹ، 2010 کے تحت ادارے کی رجسٹریشن کی منسوخی اور جرمانے جیسی کارروائی کا بھی التزام ہے۔

ساتھ ہی، نیشنل میڈیکل کمیشن نے 5 ستمبر 2026 کی اپنی ایڈوائزری میں بھی اس بات کا اعادہ کیا ہے کہ اسٹیم سیل تھراپی کو صرف منظور شدہ بیماریوں اور علامات کے لیے ایک معیاری طبی خدمت کے طور پر پیش کیا جا سکتا ہے۔ منظور شدہ دائرہ کار سے باہر اسٹیم سیل تھراپی کا غیر مجاز استعمال، نسخے، فروغ، یا اشتہار بازی کو پیشہ ورانہ بدانتظامی سمجھا جا سکتا ہے۔

کمیشن نے ریاستی طبی کونسلوں سے بھی کہا ہے کہ وہ قواعد کی خلاف ورزی کی شکایات کی تحقیقات کریں اور اگر خلاف ورزی مناسب عمل کے بعد ثابت ہو جاتی ہے تو متعلقہ ڈاکٹر کے خلاف قواعد کے مطابق تادیبی کارروائی کی جائے۔

ہندوستھان سماچار

---------------

ہندوستان سماچار / عبدالسلام صدیقی