نئی دہلی، 16 ستمبر (ہ س)۔ مرکزی حکومت نے کہا ہے کہ کسی بااختیار بالغ فرد کو یہ اجازت دی جانی چاہیے کہ وہ اپنے ہم جنس ساتھی کو اپنی جانب سے صحت سے متعلق فیصلے کرنے کے لیے نامزد کر سکے، تاکہ اگر وہ بعد میں خود فیصلے کرنے کے قابل نہ رہے تو اس کا ساتھی اس کی جانب سے فیصلے لے سکے۔

مرکزی وزارت صحت و خاندانی بہبود اور نیشنل میڈیکل کمیشن نے دہلی ہائی کورٹ سے یہ بات کہی ہے۔ مرکزی حکومت نے کہا ہے کہ موجودہ قوانین اور مناسب حفاظتی اقدامات کے تحت اس طرح کے طریقہ کار کو قانونی اور اخلاقی دائرہ کار میں شامل کیا جا سکتا ہے۔ نیشنل میڈیکل کمیشن نے دہلی ہائی کورٹ میں داخل کیے گئے حلف نامے میں یہ بات کہی ہے۔ یہ حلف نامہ ارشیا ٹکر کی اس عرضی کے جواب میں داخل کیا گیا، جس میں مطالبہ کیا گیا تھا کہ مریض کے غیر ہم جنس پرست ساتھی کو اس کا طبی نمائندہ تسلیم کرنے اور طبی حالات میں رضامندی دینے کے لیے رہنما اصول جاری کیے جائیں۔

حلف نامے میں مرکزی حکومت نے کہا ہے کہ وہ ایل جی بی ٹی کیو برادری سمیت تمام افراد کو حاصل عزت، رازداری، خود اختیاری، مساوات اور ذاتی پسند کے آئینی حقوق کو تسلیم کرتی ہے اور ان کا احترام کرتی ہے۔ حلف نامے میں مرکزی حکومت نے واضح کیا ہے کہ اس کے جواب کا مقصد ہم جنس تعلقات میں رہنے والے افراد کو حاصل آئینی تحفظات پر سوال اٹھانا نہیں ہے۔ ارشیا ٹکر کی عرضی میں مطالبہ کیا گیا ہے کہ کسی مریض کی جانب سے اپنے غیر ہم جنس پرست ساتھی کو پہلے سے دیا گیا میڈیکل پاور آف اٹارنی اس بات کے لیے کافی ہونا چاہیے کہ وہ ساتھی علاج یا طبی ایمرجنسی کے وقت باضابطہ طبی نمائندے کے طور پر کام کر سکے۔

ہندوستھان سماچار

---------------

ہندوستان سماچار / عبدالواحد