نئی دہلی، 16 ستمبر (ہ س)۔ تہواروں اور شادیوں کے سیزن سے عین قبل سونا چاندی خریدنے والوں کو جھٹکا لگنے والا ہے۔ مرکزی حکومت نے ہال مارکنگ فیس میں اضافہ کر دیا ہے۔ ترمیم شدہ ہال مارکنگ فیس فوری طور پر نافذ کر دی گئی ہے۔

بیورو آف انڈین اسٹینڈرڈز (بی آئی ایس) نے سونے اور چاندی کے زیورات پر ہال مارکنگ فیس میں اضافہ کیا ہے۔ سونے کے لیے یہ فیس 45 روپے سے بڑھا کر 75 روپے کر دی گئی ہے، جو تقریباً 67 فیصد اضافہ ہے۔ تاہم، چاندی کے زیورات کے لیے فیس 35 روپے فی شے برقرار رکھی گئی ہے۔ اس فیصلے کو فوری طور پر نافذ کرنے پر زیورات کی صنعت نے تشویش کا اظہار کیا ہے۔

ہال مارکنگ فیس میں یہ اضافہ 14 ستمبر 2026 کو جاری کیے گئے بی آئی ایس (ہال مارکنگ) ترمیمی ضوابط، 2026 کے ذریعے نوٹیفائی کیا گیا ہے۔ ترمیم شدہ شیڈول IV کے تحت جیولرز کو فی شے 75 روپے ہال مارکنگ فیس ادا کرنی ہوگی۔ اب تک سونے کے زیورات پر ہال مارک کا نشان لگانے کی فیس 45 روپے تھی۔

نوٹیفکیشن کے مطابق، ایک کھیپ کے لیے کم از کم فیس 200 روپے ہوگی۔ وہیں، چاندی کی اشیا کے لیے تسلیم شدہ جانچ اور ہال مارکنگ مراکز (اے ایچ سی) کو فی یونٹ 35 روپے فیس ادا کی جائے گی اور ایک کھیپ کے لیے کم از کم فیس 150 روپے ہوگی۔ ترمیم شدہ ہال مارکنگ فیس فوری اثر سے نافذ ہوگی۔ زیورات کی صنعت نے 67 فیصد اضافے پر تشویش ظاہر کرتے ہوئے حکومت سے فوری نظرثانی کا مطالبہ کیا ہے۔

آل انڈیا جیم اینڈ جیولری ڈومیسٹک کونسل (جی جے سی) نے حکومت اور بی آئی ایس سے فیس میں اضافے کا فوری جائزہ لینے اور متعلقہ فریقوں سے مشاورت مکمل ہونے تک موجودہ فیس برقرار رکھنے کی اپیل کی ہے۔ تنظیم نے کہا کہ لازمی تعمیل کی لاگت میں تقریباً 67 فیصد اضافے کی بغیر جائزے کے اجازت نہیں دی جانی چاہیے۔

واضح رہے کہ بی آئی ایس ہال مارکنگ زیورات میں استعمال ہونے والی قیمتی دھات کی خالصیت کی تصدیق کرتی ہے۔ بیورو آف انڈین اسٹینڈرڈز کے تحت تصدیق شدہ زیورات پر تین اہم نشانات ہوتے ہیں، جن میں بی آئی ایس کا لوگو، کیرٹ یعنی ملی سیمَل فائننس اور چھ ہندسوں پر مشتمل الفانیومیرک کوڈ (ہال مارک یونیک آئیڈینٹیفکیشن) شامل ہیں۔

ہندوستھان سماچار

---------------

ہندوستان سماچار / عبدالواحد