نئی دہلی، 15 ستمبر (ہ س)۔ محکمہ دیہی ترقی اور پنشن فنڈ ریگولیٹری اینڈ ڈیولپمنٹ اتھارٹی (پی ایف آر ڈی اے) نے دیہی گھرانوں کو پنشن اور ریٹائرمنٹ سیکیورٹی سے متعلق معلومات فراہم کرنے کے لیے ایک مفاہمت نامے پر دستخط کیے ہیں۔ اس کے تحت ملک بھر میں 'پنشن سکھی' نیٹ ورک تیار کیا جائے گا۔

دیہی ترقی کی وزارت کے مطابق، اس معاہدے پر جوائنٹ سکریٹری امت شکلا اور پی ایف آر ڈی اے کی ایگزیکٹو ڈائریکٹر سمیت کور کپور کے درمیان دیہی ترقی کے سکریٹری روہت کنسل کی موجودگی میں دستخط کیے گئے۔ اس پہل کے تحت دین دیال انتیودیا یوجنا-نیشنل رورل لائیولی ہڈ مشن (ڈی اے وائی-این آر ایل ایم) کے سیلف ہیلپ گروپس، بینکنگ کورسپونڈنٹ سکھیوں اور دیگر تربیت یافتہ کمیونٹی ورکرز کی مدد سے پنشن کی معلومات گاوں گاوں تک پہنچائی جائیں گی۔

وزارت نے کہا کہ پنشن سکھی پنشن اسکیموں، ریٹائرمنٹ کی منصوبہ بندی، اندراج کے عمل اور دیہی خواتین، سیلف ہیلپ گروپوں کے اراکین، لکھ پتی دیدیوں اور دیگر دیہی گھرانوں کو متعلقہ خدمات کے بارے میں معلومات فراہم کریں گی۔

اس موقع پر خطاب کرتے ہوئے دیہی ترقی کے سکریٹری روہت کنسل نے کہا کہ سماجی تحفظ نہ صرف خطرات سے تحفظ کا ایک ذریعہ ہے بلکہ اس سے خاندانوں کو مالی طور پر ترقی کرنے کا اعتماد بھی ملتا ہے۔ انہوں نے کہا کہ دیہی شہریوں کو واضح اور شفاف معلومات تک رسائی حاصل ہونی چاہیے تاکہ وہ اپنی طویل مدتی مالی سلامتی کے بارے میں ٹھوس فیصلے کر سکیں۔

پی ایف آر ڈی اے کی جانب سے ممتا شنکر نے کہا کہ بڑھتی ہوئی متوقع عمر اور بدلتے ہوئے آبادیاتی منظر نامے کے پیش نظر ریٹائرمنٹ کی منصوبہ بندی کی اہمیت میں اضافہ ہوا ہے۔ انہوں نے امید ظاہر کی کہ اس پہل سے دیہی علاقوں میں قومی پنشن نظام (این پی ایس) سمیت مختلف پنشن مصنوعات کے بارے میں بیداری میں اضافہ ہوگا۔

وزارت کے مطابق اس تقریب کی نگرانی ڈیجیٹل ڈیش بورڈز، موبائل اور ویب پر مبنی نظام کے ذریعے کی جائے گی۔ اس کے لیے محکمہ دیہی ترقی کا 'لوکوس' نظام بھی استعمال کیا جائے گا۔

ہندوستھان سماچار

---------------

ہندوستان سماچار / عبدالسلام صدیقی