جموں, 15 ستمبر (ہ س)۔ جموں و کشمیر کے وزیر برائے جل شکتی، جنگلات، ماحولیات اور قبائلی امور جاوید احمد رانا نے منگل کو پونچھ ضلع کے مینڈھر کے قصبہ علاقے میں 3.35 کروڑ روپے کی لاگت سے تعمیر ہونے والے ہیلی پیڈ اور ویٹنگ لاؤنج کا سنگ بنیاد رکھا۔یہ منصوبہ یو ٹی کیپیکس کے تحت تعمیر کیا جائے گا اور اس کی تخمینہ لاگت 335.40 لاکھ روپے ہے۔ منصوبے کا مقصد دور دراز سرحدی علاقے میں رابطے اور ہنگامی خدمات کے بنیادی ڈھانچے کو مضبوط بنانا ہے۔اس موقع پر جاوید احمد رانا نے کہا کہ ہیلی پیڈ مینڈھر کے لوگوں کا دیرینہ مطالبہ تھا، جسے وزیر اعلیٰ عمر عبداللہ کی قیادت والی حکومت نے پورا کیا ہے۔ انہوں نے کہا کہ یہ سہولت طبی ہنگامی صورتحال، قدرتی آفات اور دیگر مواقع پر لوگوں اور ضروری خدمات کی فوری منتقلی میں اہم کردار ادا کرے گی۔

وزیر نے کہا کہ سرحدی اور دور دراز علاقوں میں بنیادی ڈھانچے کی ترقی حکومت کی ترجیح ہے اور بہتر رابطے سے صحت، ہنگامی خدمات، سیاحت اور اقتصادی سرگرمیوں کو فروغ ملے گا۔

اس موقع پر وزیر نے بھیرا قصب میں 13.57 کروڑ روپے کی لاگت سے جدید قبائلی سیاحتی گاؤں قائم کرنے کا بھی اعلان کیا۔ انہوں نے کہا کہ یہ منصوبہ ہیلی پیڈ کے قریب تعمیر کیا جائے گا اور اس کے ذریعے علاقے کی قبائلی ثقافت، روایات، دستکاری، کھانوں اور طرز زندگی کو فروغ دیا جائے گا۔

انہوں نے کہا کہ دونوں منصوبوں کی تکمیل سے بھیرا قصب اور ملحقہ علاقوں میں سیاحت اور اقتصادی سرگرمیوں کو فروغ ملے گا اور مقامی لوگوں کے لیے روزگار کے نئے مواقع پیدا ہوں گے۔

تقریب میں ہزاروں مقامی افراد کے علاوہ ضلع انتظامیہ اور پبلک ورکس (روڈز اینڈ بلڈنگز) محکمہ کے اعلیٰ افسران نے شرکت کی۔ مقامی لوگوں نے منصوبے کے آغاز اور قبائلی سیاحتی گاؤں کے اعلان کا خیرمقدم کیا۔

ہندوستھان سماچار

---------------

ہندوستان سماچار / محمد اصغر