مغربی سنگھ بھوم، 15 ستمبر (ہ س)۔ مغربی سنگھ بھوم ضلع کے صدر تھانہ علاقے کے نیو کالونی نیم ڈیہہ میں اسمارٹ میٹر لگانے پہنچی بجلی محکمہ کی تکنیکی ٹیم کے ساتھ مارپیٹ اور بدسلوکی کا معاملہ سامنے آیا ہے۔ واقعے کے سلسلے میں اسمارٹ میٹرنگ کا کام کر رہی بنٹیک انڈیا کمپنی کے سائٹ انچارج جتیندر یادو نے پیر کی دیر رات صدر تھانے میں تحریری شکایت درج کرائی ہے۔ شکایت کی بنیاد پر پولیس نے ٹریکٹر کاروباری منیش رام کے خلاف نامزد ایف آئی آر درج کرکے معاملے کی تفتیش شروع کر دی ہے۔

درج شکایت کے مطابق جھارکھنڈ بجلی وِترن نگم لمیٹڈ نے بنٹیک انڈیا کمپنی کو اسمارٹ میٹر لگانے کا کام سونپا ہے۔ اسی کام کے تحت جتیندر یادو اپنے ساتھی ابھی نندن گپتا اور اجے سنگھ کے ساتھ پیر کی دوپہر نیو کالونی نیم ڈیہہ میں منیش رام کے گھر اسمارٹ میٹر لگانے پہنچے تھے۔

شکایت میں بتایا گیا ہے کہ گھر سے باہر آنے والے ایک شخص کو ٹیم نے اسمارٹ میٹر لگانے کے عمل کے بارے میں معلومات دی۔ زبانی رضامندی ملنے کے بعد ملازمین نے پرانا بجلی میٹر ہٹا کر نیا اسمارٹ میٹر لگانے کا کام شروع کر دیا۔

الزام ہے کہ اسی دوران منیش رام موقع پر پہنچے اور ملازمین سے پوچھ گچھ کی۔ ٹیم نے انہیں اسمارٹ میٹر لگانے کے حوالے سے معلومات دی، جس کے بعد وہ وہاں سے چلے گئے۔ کچھ دیر بعد دوبارہ واپس آکر انہوں نے ملازمین سے اتھارٹی لیٹر دکھانے کو کہا۔

شکایت کنندہ کے مطابق باقاعدہ اتھارٹی لیٹر دکھائے جانے کے باوجود منیش رام مبینہ طور پر مشتعل ہو گئے اور گالی گلوچ کرتے ہوئے کام بند کرنے کو کہا۔

الزام ہے کہ اسمارٹ میٹر لگانے کی مخالفت کرتے ہوئے انہوں نے ملازمین کے ساتھ مارپیٹ شروع کر دی۔ بیچ بچاؤ کے لیے پہنچے ابھی نندن گپتا اور اجے سنگھ کے ساتھ بھی ہاتھا پائی کرنے کا الزام عائد کیا گیا ہے۔

شکایت میں یہ بھی الزام لگایا گیا ہے کہ واقعے کی اطلاع پولیس اور بجلی محکمہ کے افسران کو دینے پر خاتون سے چھیڑ چھاڑ کے جھوٹے معاملے میں پھنسانے کی دھمکی دی گئی۔

واقعے کے بعد بجلی محکمہ کے ایگزیکٹو انجینئر گوتم رانا کے ساتھ ایجنسی کے سائٹ انچارج تھانے پہنچے اور تحریری شکایت دی۔ پولیس نے ایف آئی آر درج کرکے معاملے کی تفتیش شروع کر دی ہے۔

ہندوستھان سماچار

---------------

ہندوستان سماچار / عبدالواحد