آگرہ، 14 ستمبر (ہ س)۔

یوگانڈا کی نائب صدر جیسیکا الپو پیر کے روز نئی دہلی سے اپنے وفد کے ہمراہ اترپردیش کے آگرہ پہنچیں۔ یہاں انہوں نے عالمی شہرت یافتہ تاج محل کی خوبصورتی کا نظارہ کیا اور اس دوران ’ڈیانا بینچ‘ پر بیٹھ کر تصاویر بھی بنوائیں۔

یوگانڈا کی نائب صدر نئی دہلی میں منعقدہ 18ویں برکس سربراہی اجلاس میں شرکت کے بعد پیر کے روز 20 رکنی وفد کے ساتھ سڑک کے راستے تاج محل کے مغربی دروازے پر پہنچیں اور تاج محل کا دیدار کیا۔ اس دوران انہوں نے اپنے ساتھ موجود گائیڈ سے تاج محل کی تاریخ، سنگِ مرمر کے پتھروں پر پچی کاری اور شاہ جہاں و ممتاز کے مقبروں کے بارے میں معلومات حاصل کیں۔

نائب صدر الپو نے تاج محل کے احاطے میں واقع ’ڈیانا بینچ‘ پر بیٹھ کر پس منظر میں تاج محل کو رکھتے ہوئے تصاویر بنوائیں اور تاج محل کی خوبصورتی کی یادوں کو تصاویر میں محفوظ کیا۔

وزیٹر بک میں لکھا: ’Taj-Mahal is very beautiful and precious‘

تاج محل میں تعینات محکمہ آثارِ قدیمہ (اے ایس آئی) کے سینئر آثارِ قدیمہ معاون قلندر وج نے بتایا کہ نائب صدر جیسیکا الپو نے تاج محل میں رکھی وزیٹر بک میں تاج محل کی خوبصورتی اور اس کے فنِ تعمیر کی بھرپور تعریف کی۔ انہوں نے وزیٹر بک میں لکھا: ’Taj-Mahal is very beautiful and precious‘، یعنی ’تاج محل بہت خوبصورت اور بیش قیمت ہے۔‘

تقریباً سوا گھنٹے تک تاج محل کی خوبصورتی کا نظارہ کرنے، تصاویر بنوانے اور گائیڈ سے تاج محل میں سفید سنگِ مرمر پر کی گئی خوبصورت پچی کاری، تاریخ اور اس کی تعمیر سے متعلق مختلف معلومات حاصل کرنے کے بعد وہ اپنے وفد کے ہمراہ تاج محل سے اگلے پروگراموں کے لیے روانہ ہوگئیں۔

ہندوستھان سماچار

ہندوستان سماچار / عطاءاللہ