نئی دہلی، 14 ستمبر (ہ س)۔

بھارتیہ جنتا پارٹی (بی جے پی) کے قومی ترجمان اور راجیہ سبھا رکن پارلیمنٹ ڈاکٹر سدھانشو تریویدی نے کہا کہ راجستھان کی 309 مقامی بلدیاتی اداروں میں ہونے والے انتخابات کے نتائج میں بھارتیہ جنتا پارٹی شاندار کامیابی کی جانب بڑھ رہی ہے اور 10 میونسپل کارپوریشنوں میں سے 9 میں بی جے پی اپنے اتحادیوں کے ساتھ حکومت بنانے کی پوزیشن میں ہے۔

پیر کے روز مرکزی دفتر میں میڈیا سے بات چیت کرتے ہوئے ڈاکٹر تریویدی نے کہا کہ کانگریس حکومت کی جانب سے انتخابات آٹھ مراحل میں کرانے اور جے پور، جودھپور اور کوٹہمیونسپل کارپوریشنوں کو تقسیم کرنے کی پالیسی کو عوام نے مسترد کر دیا، جبکہ بی جے پی حکومت نے انتخابات ایک ہی مرحلے میں کرائے۔

ڈاکٹر سدھانشو تریویدی نے کہا کہ راجستھان میں مقامی بلدیاتی انتخابات کے نتائج سامنے آ گئے ہیں۔ اب تک موصول ہونے والے مسلسل نتائج کے مطابق بھارتیہ جنتا پارٹی شاندار کامیابی کی طرف بڑھ رہی ہے۔ راجستھان میں 10 میونسپل کارپوریشنوں، 47 میونسپل کونسلوں اور 252 میونسپلٹیوں سمیت مجموعی طور پر 309 مقامات پر انتخابات ہوئے تھے۔

موجودہ صورتِ حال میں 10 میں سے صرف ایک میونسپل کارپوریشن میں کانگریس آگے ہے، جبکہ باقی تمام میونسپل کارپوریشنوں میں بھارتیہ جنتا پارٹی اپنے اتحادیوں کے ساتھ حکومت بنانے کی پوزیشن میں ہے۔ کانگریس حکومت نے راجستھان میں مقامی بلدیاتی انتخابات کے ساتھ جو کھلواڑ کیا تھا، عوام نے اس کا منہ توڑ جواب دیا ہے۔

بی جے پی کے قومی ترجمان نے کہا کہ راجستھان میں مقامی بلدیاتی انتخابات آٹھ مراحل میں کرائے گئے تھے، جبکہ بی جے پی حکومت نے انہیں ایک ہی مرحلے میں کرایا۔ جے پور، جودھپور اور کوٹہ کی میونسپل کارپوریشنوں کو تقسیم کر دیا گیا تھا۔ اس کے باوجود بھارتیہ جنتا پارٹی کے حق میں ہونے والی ووٹنگ سے واضح ہے کہ راجستھان کے عوام نے میونسپل کارپوریشنوں کو توڑنے اور ان کی تقسیم کی پالیسی کو پوری طرح مسترد کر دیا ہے۔

انہوں نے کہا کہ یہ ایک بار پھر ظاہر کرتا ہے کہ وزیر اعظم نریندر مودی کی قیادت میں ملک کے عوام کا اعتماد مسلسل بڑھ رہا ہے۔ اس کے ساتھ ہی راجستھان کے عوام نے وزیر اعلیٰ بھجن لال شرما کی حکومت کے تئیں بھی اپنی مثبت منظوری کا اظہار کیا ہے۔

ڈاکٹر تریویدی نے کہا کہ اس سے بھی زیادہ اہم بات یہ ہے کہ کوٹہ، جہاں راہل گاندھی نے جا کر جھوٹ کی گونج پیدا کرنے کی کوشش کی تھی، وہاں بھارتیہ جنتا پارٹی شاندار انداز میں کامیاب ہوتی نظر آ رہی ہے۔ یہ کہیں نہ کہیں ظاہر کرتا ہے کہ کانگریس پارٹی کی باتوں میں تشہیر زیادہ اور حقیقت کم ہوتی ہے۔

انہوں نے کہا کہ ہم نے ایک ساتھ ’ون الیکشن، ون اسٹیٹ‘ کے تحت انتخابات کرائے، جبکہ کانگریس نے اتنے مراحل میں انتخابات کرائے اور اس کے باوجود اسے کامیابی نہیں ملی۔ لہٰذا ہم ان انتخابی نتائج کے لیے راجستھان کے عوام کا شکریہ ادا کرتے ہیں اور بھارتیہ جنتا پارٹی کے کارکنوں کا بھی شکریہ ادا کرتے ہیں۔ ہم بی جے پی کی تنظیم، ریاستی صدر اور تمام متعلقہ افراد کو مبارکباد پیش کرتے ہیں۔

ڈاکٹر سدھانشو تریویدی نے کہا کہ ایک بار پھر یہ بات واضح ہو جاتی ہے کہ گزشتہ مرتبہ جن چھ اضلاع—بوندی، دوسہ، ہنومان گڑھ، کرولی، دھولپور اور بھرت پور—میں بی جے پی کسی بھی بلدیاتی ادارے میں ایک بھی بورڈ تشکیل نہیں دے سکی تھی، ان اضلاع میں بھی اس بار بی جے پی شاندار انداز میں آگے بڑھ رہی ہے۔ لہٰذا یہ بی جے پی کی سماجی اور جغرافیائی رسائی کو وسعت دینے کی سمت میں بھی ایک اہم قدم ہے۔

ہندوستھان سماچار

ہندوستان سماچار / عطاءاللہ