سری گنگانگر، 13 ستمبر (ہ س)۔

بھارت-پاکستان بین الاقوامی سرحد پر سری گنگانگر سیکٹر کے راولا علاقے میں بارڈر سکیورٹی فورس (بی ایس ایف) اور پولیس نے مشترکہ کارروائی کرتے ہوئے تقریباً 5 کلو 600 گرام ہیروئن اور 500 گرام افیم برآمد کی ہے۔

برآمد شدہ منشیات کی بین الاقوامی مارکیٹ میں قیمت تقریباً 30 کروڑ روپے بتائی گئی ہے۔ ابتدائی تفتیش میں شبہ ظاہر کیا جا رہا ہے کہ یہ منشیات کی کھیپ پاکستان کی جانب سے ڈرون کے ذریعے بھارتی علاقے میں پہنچائی گئی۔

اطلاعات کے مطابق بی ایس ایف کی جی برانچ کو 14 کے این ڈی علاقے میں مشتبہ سرگرمیوں اور منشیات کی کھیپ پہنچائے جانے سے متعلق خفیہ اطلاع ملی تھی۔ اس اطلاع کی بنیاد پر بی ایس ایف کی 140ویں بٹالین اور مقامی پولیس نے علاقے میں تلاشی مہم شروع کی۔

تلاشی کے دوران ایک کسان کے کھیت سے مشتبہ پیکٹ برآمد ہوئے۔ جانچ میں ان پیکٹوں میں تقریباً 5 کلو 600 گرام ہیروئن اور 500 گرام افیون موجود ہونے کی تصدیق ہوئی۔

سکیورٹی ایجنسیوں کے مطابق کھیت سے ملنے والے پیکٹ رسی سے بندھے ہوئے تھے۔ پیکنگ کے اس طریقے کو دیکھتے ہوئے تفتیشی ایجنسیاں اس پہلو کی بھی جانچ کر رہی ہیں کہ آیا انہیں ڈرون کے ذریعے سرحد پار سے بھارتی علاقے میں گرایا گیا تھا۔

تاہم ابھی تک سرکاری طور پر اس بات کی تصدیق نہیں ہوئی ہے کہ برآمد شدہ منشیات واقعی ڈرون کے ذریعے پاکستان سے بھارت لائی گئی تھیں۔ اس کی حتمی تصدیق تفتیش مکمل ہونے کے بعد ہی ہو سکے گی۔

ہندوستھان سماچار

ہندوستان سماچار / عطاءاللہ