ٹرانسمیشن لائنوں میں پرندوں سے ٹریپنگ روکنے کے لیے ایم پی کا تکنیکی اقدام، برڈ گارڈ-پروینٹر سے کامیابی ملی

بھوپال، 11 ستمبر (ہ س)۔ جنگلات، آبی ذخائر اور ندی کے ساحلی علاقوں سے گزرنے والی ٹرانسمیشن لائنوں میں پرندوں کی سرگرمیوں کے باعث ہونے والی ٹریپنگ کو روکنے کے لیے مدھیہ پردیش پاور ٹرانسمیشن کمپنی (ایم پی ٹرانسکو) کی جانب سے وندھیہ خطے میں خصوصی تکنیکی اقدامات کیے جا رہے ہیں۔ ریوا، ستنا، پنا، سیدھی اور سنگرولی اضلاع کے پرندوں کے لیے حساس علاقوں سے گزرنے والی 132 کے وی اور 220 کے وی ٹرانسمیشن لائنوں کے ٹاورز پر برڈ فلائٹ ڈائیورٹر (بی ایف ڈی)، برڈ گارڈ اور برڈ ایکسکریٹا پروینٹر لگائے جا رہے ہیں۔

ایم پی ٹرانسکو ریوا ستنا کے ایگزیکٹو انجینئر امت کمار نے جمعہ کو بتایا کہ سال 26-2025 میں پرندوں کی وجہ سے ریوا خطے کی ٹرانسمیشن لائنوں میں تقریباً 20 ٹریپنگ درج کی گئی تھیں۔ ان واقعات کے تکنیکی تجزیے کے بعد حساس مقامات پر برڈ گارڈ اور برڈ ایکسکریٹا پروینٹر لگانے کا فیصلہ کیا گیا۔ ان کے استعمال کے بعد پرندوں سے پیدا ہونے والی ٹریپنگ کے واقعات تقریباً صفر ہو گئے ہیں۔ مقامی حالات اور پرندوں کی عادات و اطوار کو مدنظر رکھ کر کیے گئے یہ تکنیکی اقدامات مثر ثابت ہو رہے ہیں۔

انہوں نے بتایا کہ جنگلات اور آبی ذخائر کے آس پاس سے گزرنے والی ٹرانسمیشن لائنوں کے ٹاورز پرندوں کے بیٹھنے اور گھونسلا بنانے کی جگہ بن جاتے ہیں۔ ٹاور پر بیٹھ کر پرندوں کے فضلے سے یہ مادہ انسولیٹر ڈسک پر جمع ہو سکتا ہے۔ بارش یا زیادہ نمی کی صورت میں اس کی برقی موصلیت (الیکٹریکل کنڈکٹیویٹی) بڑھنے سے فلیش اوور اور لائن ٹریپنگ کی صورت پیدا ہو سکتی ہے۔ اس مسئلے کو کم کرنے کے لیے برڈ گارڈ کو ٹاور کے کراس آرم کے کناروں پر لگایا جاتا ہے۔ اس کی بناوٹ پرندوں کو وہاں بیٹھنے اور گھونسلا بنانے میں دشواری پیدا کرتی ہے۔ یہ انتظام چند مقامات پر بندروں کو کراس آرم کے کنارے تک پہنچنے سے روکنے میں بھی مددگار ثابت ہوتا ہے۔

ایگزیکٹو انجینئر نے بتایا کہ برڈ ایکسکریٹا پروینٹر کو ڈسک انسولیٹر کے اوپری حصے پر نصب کیا جاتا ہے۔ اگر پرندہ ٹاور کے کراس آرم پر بیٹھ کر فضلہ خارج کرتا ہے تو پروینٹر کی وجہ سے یہ براہِ راست انسولیٹر ڈسک پر جمع نہیں ہو پاتا۔ اس سے انسولیٹر کی انسولیشن صلاحیت متاثر ہونے اور نتیجتاً ٹریپنگ ہونے کا امکان کافی کم ہو جاتا ہے۔

ایگزیکٹو انجینئر امت کمار کی پہل پر ریوا ٹرانسمیشن لائن مینٹیننس میں تعینات اسسٹنٹ انجینئر اجے چورسیا نے وندھیہ خطے میں پرندوں کی وجہ سے ہونے والی ٹریپنگ کے مسئلے کے تکنیکی مطالعے کی بنیاد پر اہم پہل کی۔ فیلڈ کی عملی و تکنیکی ضرورت، خطے میں پائے جانے والے پرندوں کی عادات و اطوار اور مقامی حالات کے مطابق برڈ پروینٹر ڈیوائسز میں اندرونی طور پر ضروری تکنیکی ترامیم کے ساتھ ٹرانسمیشن لائنوں پر استعمال کیا گیا۔ اس کے نتیجے میں پرندوں سے ہونے والی ٹریپنگ میں نمایاں کمی واقع ہوئی۔

انہوں نے بتایا کہ مدھیہ پردیش کے وندھیہ خطے میں ایم پی ٹرانسکو کی جانب سے پرندوں کے حساس علاقوں سے گزرنے والی ٹرانسمیشن لائنوں پر پرندوں کے تحفظ کے خصوصی اقدامات کیے جا رہے ہیں۔ اس کے تحت 220 کے وی کی 05 عدد ٹرانسمیشن لائنوں کے 470 ٹاورز اور 133.68 کلومیٹر طویل نیٹ ورک پر 210 گارڈز اور 50 پروینٹرز لگائے جا رہے ہیں۔ اسی طرح 132 کے وی کی 15 عدد ٹرانسمیشن لائنوں کے 1,530 ٹاورز اور 440 کلومیٹر طویل نیٹ ورک پر 1,600 گارڈز اور 150 پروینٹرز نصب کیے جا رہے ہیں۔ ان اقدامات کا مقصد ایک طرف پرندوں کی وجہ سے ٹرانسمیشن لائنوں میں ہونے والی ٹریپنگ کے واقعات کو کم کرنا ہے، وہیں دوسری طرف پرندوں کو بجلی کی لائنوں کی زد میں آنے سے بچا کر ان کی اموات اور زخمی ہونے کے واقعات کو روکنا نیز خطے کے حیاتیاتی تنوع اور پرندوں کے تحفظ کو فروغ دینا ہے۔

وندھیہ خطے کے بان ساگر اور ریہند آبی ذخائر، سون اور ٹمس ندی کے ساحلی علاقوں، سنجے ڈوبری ٹائیگر ریزرو کے آس پاس کے جنگلاتی علاقوں اور دیگر آبی ذخائر میں مقامی اور مہاجر پرندوں کی بڑی تعداد میں آمد و رفت رہتی ہے۔ ان علاقوں سے گزرنے والی ٹرانسمیشن لائنوں میں پرندوں کی سرگرمیاں زیادہ ہونے کے سبب ایم پی ٹرانسکو کے ذریعے حساس ٹاورز کی نشاندہی کر کے مرحلہ وار طریقے سے برڈ گارڈ اور برڈ ایکسکریٹا پروینٹر لگائے جا رہے ہیں۔ ان تکنیکی تدابیر سے ایک طرف پرندوں کے ٹرانسمیشن لائنوں سے ٹکرانے اور برقی ڈھانچوں کے رابطے میں آنے کا امکان کم ہوگا، وہیں دوسری جانب پرندوں کے ذریعے پیدا ہونے والے فالٹ، ٹریپنگ اور بریک ڈان میں کمی آنے سے وندھیہ خطے کے پاور ٹرانسمیشن نظام کی پائیداری اور دستیابی مزید بہتر ہوگی۔

ہندوستھان سماچار

---------------

ہندوستان سماچار / انظر حسن