کولمبو، 9 اگست (ہ س)۔ ہندوستانی ٹیسٹ ٹیم کے کپتان شبھمن گل نے سری لنکا کرکٹ الیون کے خلاف واحد پریکٹس میچ سے باہر رہنے کے بعد اتوار کو نیٹس میں واپسی کر لی۔ کولمبو کے این سی سی گراؤنڈ میں جاری پریکٹس میچ کے تیسرے اور آخری روز گل کو سائیڈ نیٹس میں بیٹنگ کرتے ہوئے دیکھا گیا۔

شبھمن گل پریکٹس میچ سے قبل دائیں ہاتھ کے انگوٹھے میں چوٹ لگنے کے باعث مقابلے سے باہر ہو گئے تھے۔ پریکٹس سیشن کے دوران بیٹنگ کرتے ہوئے گیند ان کی انگلی پر لگی تھی، جس کے بعد احتیاطی طور پر انہیں پریکٹس میچ سے دور رکھنے کا فیصلہ کیا گیا۔

میچ کے آغاز کے وقت کے ایل راہل کو ہندوستانی ٹیم کی قیادت سونپی گئی تھی۔ اس کے بعد بھارتی کرکٹ کنٹرول بورڈ (بی سی سی آئی) نے بتایا تھا کہ گل پریکٹس میچ کے پہلے روز میدان میں نہیں اتریں گے۔

بی سی سی آئی نے اپنے بیان میں کہا تھا کہ کپتان شبھمن گل کو جمعرات کو ہندوستان کے پریکٹس سیشن کے دوران دائیں ہاتھ کی انگلی میں چوٹ لگی ہے۔ احتیاطی اقدام کے طور پر انہیں سری لنکا کرکٹ الیون کے خلاف پریکٹس میچ کے پہلے دن میدان سے باہر رکھنے کا فیصلہ کیا گیا ہے۔تاہم میچ کے دوسرے روز ہندوستانی ٹیم کی بیٹنگ کے دوران بھی گل بلے بازی کے لیے میدان میں نہیں اترے۔ ان کے معمول کے بیٹنگ آرڈر پر رویندر جڈیجہ نے بلے بازی کی۔

گل کی نیٹس میں واپسی ہندوستانی ٹیم کے لیے راحت کی خبر ہے، کیونکہ بھارت اور سری لنکا کے درمیان دو ٹیسٹ میچوں کی سیریز 15 اگست سے گال میں شروع ہونے جا رہی ہے۔ سیریز کا دوسرا ٹیسٹ کولمبو کے ایس ایس سی اسٹیڈیم میں کھیلا جائے گا۔اگر گل مکمل طور پر فٹ رہتے ہیں تو ان کی واپسی سے ہندوستانی ٹیم کو سری لنکا کے خلاف ٹیسٹ سیریز سے قبل بڑا حوصلہ ملے گا۔

ہندوستھان سماچار

ہندوستان سماچار / Mohammad Khan