پلامو، 30 اگست (ہ س):۔

رانچی میں سوائن فلو کے مریض ملنے کے بعد پلامو ضلع میں بھی محکمہ صحت نے الرٹ جاری کیا ہے۔ سول سرجن انیل سریواستو نے ضلع کے تمام اسپتالوں اور صحت مراکز کے سپرنٹنڈنٹس، ڈپٹی سپرنٹنڈنٹس اور انچارج میڈیکل افسران کو ضروری تیاریاں یقینی بنانے کی ہدایت دی ہے۔

سوائن فلو سے متاثرہ مریضوں کے علاج کے لیے اسپتالوں کے آئسولیشن وارڈز میں خصوصی انتظامات کیے گئے ہیں۔ اس کے تحت میدینی رائے میڈیکل کالج اینڈ اسپتال (ایم ایم سی ایچ)، پلامو میں 10 بستر محفوظ رکھنے کی ہدایت دی گئی ہے۔ وہیں حسین آباد اور چھتر پور سب ڈویژنل اسپتالوں میں پانچ، پانچ اور ضلع کے تمام پرائمری ہیلتھ سینٹرز میں بھی پانچ، پانچ بستر محفوظ رکھنے کو کہا گیا ہے۔

سول سرجن نے اتوار کو جاری ہدایت میں تمام صحت اداروں کو کسی بھی ممکنہ صورتحال سے نمٹنے کے لیے پوری طرح تیار رہنے کو کہا ہے۔ انہوں نے کہا کہ رانچی میں سوائن فلو کے کیسز سامنے آنے کے بعد احتیاطی طور پر پلامو میں بھی ضروری تیاریاں کی جا رہی ہیں، تاکہ انفیکشن کے کیسز سامنے آنے کی صورت میں مریضوں کو فوری علاج فراہم کیا جا سکے۔

محکمہ صحت نے اسپتالوں اور صحت مراکز کو چوکس رہنے اور ضروری وسائل کی دستیابی یقینی بنانے کی ہدایت دی ہے۔

ہندوستھان سماچار

ہندوستان سماچار / عطاءاللہ