کولکاتا، 29 اگست (ہ س)۔

ترنمول کانگریس طلبہ کونسل (ٹی ایم سی پی) کے یومِ تاسیس پروگرام کے سلسلے میں کولکاتا پولیس نے سابق وزیر اعلیٰ ممتا بنرجی کے خلاف ایف آئی آر درج کی ہے۔ ہیسٹنگز تھانے میں درج ایف آئی آر میں عدالت کی ہدایات کی خلاف ورزی، پولیس کے ساتھ دھکا مکی، سرکاری کام میں رکاوٹ اور عدالت کی جانب سے مقررہ وقت کی حد کے بعد بھی پروگرام جاری رکھنے جیسے الزامات عائد کیے گئے ہیں۔

ممتا بنرجی کے علاوہ پروگرام کے منتظمین کے خلاف بھی بھارتیہ نیائے سنہتا (بی این ایس) کی متعدد دفعات کے تحت مقدمہ درج کیا گیا ہے۔ پولیس نے معاملے کا از خود نوٹس لیتے ہوئے یہ کارروائی کی ہے۔

جمعہ کو کولکاتا کی کیتھیڈرل روڈ پر ٹی ایم سی پی کے یومِ تاسیس کے موقع پر ترنمول کانگریس کی جانب سے جلسہ منعقد کیا گیا تھا۔ پروگرام کے سلسلے میں کلکتہ ہائی کورٹ نے ہدایت دی تھی کہ سڑک کی شمال کی جانب جانے والی لین کو ٹریفک کے لیے کھلا رکھتے ہوئے جلسہ منعقد کیا جائے۔ تاہم پولیس کے مطابق موقع پر دونوں سمتوں کی لین بند پائی گئیں۔

پروگرام کے دوران پولیس کے ساتھ مبینہ طور پر دھکا مکی ہونے کی شکایت بھی سامنے آئی۔ اس کے علاوہ عدالت نے جلسے کے لیے دوپہر 3 بجے تک کی وقت کی حد مقرر کی تھی، لیکن الزام ہے کہ مقررہ وقت گزر جانے کے بعد بھی پروگرام جاری رہا۔

ان واقعات کی بنیاد پر کولکاتا پولیس نے ممتا بنرجی اور پروگرام کے منتظمین کے خلاف از خود نوٹس لیتے ہوئے ایف آئی آر درج کی ہے۔

کیتھیڈرل روڈ کے واقعے کو لے کر وزیر اعلیٰ شبھیندو ادھیکاری نے پہلے ہی ممتا بنرجی کے خلاف کارروائی کی وارننگ دی تھی۔ انہوں نے الزام لگایا تھا کہ سابق وزیر اعلیٰ نے ہائی کورٹ کی ہدایات کی خلاف ورزی کی ہے۔

وزیر اعلیٰ شبھیندو ادھیکاری نے پولیس کو اس معاملے میں ایف آئی آر درج کرنے کی ہدایت بھی دی تھی۔ اس کے بعد ہیسٹنگز تھانے میں ممتا بنرجی اور پروگرام کے منتظمین کے خلاف مقدمہ درج کیا گیا۔

ہندوستھان سماچار

ہندوستان سماچار / عطاءاللہ