نئی دہلی، 26 اگست (ہ س)۔ مسافر ٹرانسپورٹ کے شعبے میں ملک نے ایک اہم کامیابی حاصل کی ہے۔ انٹرنیشنل سینٹر فار آٹوموٹیو ٹیکنالوجی (آئی سی اے ٹی) نے 15 میٹر طویل ملٹی ایکسل سلیپر بس کے لیے اپنا پہلا سرٹیفکیٹ جاری کیا ہے۔ یہ سرٹیفکیٹ مرکزی موٹر وہیکل قوانین اور اے آئی ایس-119 اور اے آئی ایس-153 کے تحت جاری کیا گیا ہے۔

یہ سرٹیفکیٹ سیناٹی آٹوموٹیو پرائیویٹ لمیٹڈ کو اس کی 15 میٹر طویل سلیپر بس کے لیے دیا گیا۔ یہ مسافر ٹرانسپورٹ کے لیے تیار کی جانے والی طویل ترین بسوں میں سے ایک کے ٹیسٹ اور سرٹیفکیشن کی سمت میں اہم قدم ہے۔

آئی سی اے ٹی کے ڈائریکٹر سوربھ دلیلا نے اعلیٰ افسران کی موجودگی میں کمپنی کے منیجنگ ڈائریکٹر نریش کمار یادو کو سرٹیفکیٹ سونپا۔

بس کو خاص طور پر طویل فاصلے کے سفر کے لیے تیار کیا گیا ہے۔ اس میں مضبوط ڈھانچہ، ہنگامی صورتحال میں حفاظتی انتظامات اور آگ سے بچاؤ جیسی سہولیات موجود ہیں۔ بس میں مسافروں کی آمدورفت اور آرام کا بھی خاص خیال رکھا گیا ہے۔ بس کے مکمل سلیپر ماڈل میں 42 برتھ ہیں، جبکہ ہائبرڈ سلیپر ماڈل میں 21 برتھ اور 42 نشستیں ہیں۔ اس سے طویل فاصلے کے سفر کے دوران مسافروں کو ایک ہی گاڑی میں بیٹھنے اور سونے، دونوں کی سہولت ملتی ہے۔

بس کا ٹیسٹ حفاظت، ڈھانچے کی مضبوطی، مسافروں کی سہولت اور آرام سے متعلق مقررہ تقاضوں کی بنیاد پر کیا گیا ہے۔ یہ ٹیسٹ متعلقہ آٹوموٹیو معیارات اور مرکزی موٹر وہیکل قوانین کے تحت انجام دیا گیا۔

اے آئی ایس-119 اور اے آئی ایس-153 کے تحت ملنے والا یہ سرٹیفکیٹ ظاہر کرتا ہے کہ آئی سی اے ٹی جدید مسافر گاڑیوں کی جانچ اور سرٹیفکیشن کرنے کی صلاحیت رکھتا ہے۔ اس سے گاڑی بنانے والی کمپنیوں کو حفاظتی اور دیگر ضروری تکنیکی شرائط پوری کرنے میں بھی مدد ملے گی۔

آئی سی اے ٹی کے ڈائریکٹر سوربھ دلیلا نے کہا کہ یہ سرٹیفکیشن مرکز کے لیے ایک بڑی کامیابی ہے۔ اس سے جدید مسافر گاڑیوں کی جانچ اور سرٹیفکیشن میں آئی سی اے ٹی کی تکنیکی صلاحیت سامنے آتی ہے۔ انہوں نے کہا کہ آئی سی اے ٹی مسافروں کی حفاظت اور تکنیکی ترقی پر مسلسل کام کرتا رہے گا۔ ساتھ ہی، بھارتی آٹوموبائل صنعت کو محفوظ اور قابل اعتماد ٹرانسپورٹ حل تیار کرنے میں مدد کرتا رہے گا۔

سیناٹی آٹوموٹیو کے منیجنگ ڈائریکٹر نریش کمار یادو نے سرٹیفکیشن کے لیے آئی سی اے ٹی کا شکریہ ادا کیا۔ انہوں نے کہا کہ اس سے طویل فاصلے کے مسافروں کے لیے محفوظ، قابل اعتماد اور آرام دہ گاڑیاں تیار کرنے کی کمپنی کی کوششوں کو مزید تقویت ملے گی۔

آئی سی اے ٹی گاڑیوں کی حفاظت، ضوابط کی تعمیل اور نئی ٹیکنالوجی کے لیے ٹیسٹنگ اور سرٹیفکیشن خدمات فراہم کرتا ہے۔ یہ سرٹیفکیٹ بھارت میں محفوظ اور جدید مسافر گاڑیوں کی ترقی کی سمت میں ایک اور اہم قدم ہے۔

ہندوستھان سماچار

---------------

ہندوستان سماچار / عبدالواحد