ہاوڑہ، 26 اگست (ہ س)۔ ہاوڑہ کے آندول موڑی علاقے میں بدھ کی دوپہر ایک کثیر منزلہ عمارت میں آگ لگنے سے افراتفری مچ گئی۔ عمارت کی چوتھی منزل سے اچانک دھواں نکلتا دیکھ کر مقامی لوگوں نے پولیس اور فائر بریگیڈ کو اطلاع دی۔ آگ لگنے کے وقت کئی افراد عمارت کے اندر پھنسے ہوئے تھے۔ اطلاع ملتے ہی فائر بریگیڈ کی تین گاڑیاں موقع پر پہنچیں اور آگ بجھانے کے ساتھ ساتھ راحت اور بچاؤ کا آپریشن شروع کیا۔ پولیس اور فائر بریگیڈ کے اہلکار مشترکہ طور پر عمارت کے اندر پھنسے لوگوں کو بحفاظت باہر نکالنے میں مصروف ہیں۔ اب تک آٹھ افراد کو بحفاظت باہر نکالا جا چکا ہے۔

موصولہ اطلاعات کے مطابق، چوتھی منزل پر آگ لگنے کے بعد پورے رہائشی کمپلیکس میں خوف و ہراس پھیل گیا۔ دھوئیں کی وجہ سے لوگوں کو کافی پریشانی کا سامنا کرنا پڑا۔ فائر بریگیڈ کے اہلکار عمارت کے دیگر حصوں میں بھی یہ یقینی بنا رہے ہیں کہ کوئی شخص اندر پھنسا نہ رہ گیا ہو۔

ایک مقامی رہائشی نے بتایا کہ اچانک چوتھی منزل سے آگ کے تیز شعلے دکھائی دینے لگے اور بڑی مقدار میں دھواں باہر نکلنے لگا۔ انہوں نے بتایا کہ اسی منزل پر ان کے پڑوس میں ایک خاتون بھی رہتی ہیں اور ان کے اہل خانہ ان کے حوالے سے فکرمند ہیں۔

فی الحال آگ پر قابو پانے اور عمارت میں پھنسے لوگوں کو بحفاظت باہر نکالنے کا کام جاری ہے۔ آگ لگنے کی وجوہات کا ابھی پتہ نہیں چل سکا ہے۔

قابل ذکر ہے کہ مغربی بنگال میں آگ لگنے کے واقعات کی وجہ سے مسلسل خوف و ہراس کا ماحول ہے۔ گزشتہ ہفتے ہی تاراپیٹھ اور کولکاتا کے دو گیسٹ ہاؤسز میں لگی آگ میں 18 افراد کی موت ہو چکی ہے۔

ہندوستھان سماچار

---------------

ہندوستان سماچار / عبدالواحد