امپھال، 24 اگست (ہ س)۔ پیر کے روز منی پور کے سیناپتی ضلع کے ٹیپوہو علاقے میں دو گروہوں کے درمیان فائرنگ کے واقعے میں سنٹرل ریزرو پولیس فورس (سی آر پی ایف) کا ایک جوان زخمی ہو گیا جبکہ کم از کم دو مکانات جل گئے۔ اس واقعے نے ناگا اور کوکی برادریوں کے درمیان کشیدگی کو بڑھا دیا ہے۔

آگ لگنے کا واقعہ صبح تقریبا 4 بج کر 30 منٹ پر پیش آیا۔ مسلح افراد نے مبینہ طور پر گھروں کو نشانہ بنایا اور انہیں آگ لگا دی، جس سے مقامی لوگوں میں تشویش پیدا ہو گئی۔

حکام کے مطابق صورتحال پر قابو پانے کے دوران صبح 10 بجے کے قریب دو گروہوں کے درمیان فائرنگ کا تبادلہ ہوا جس میں سی آر پی ایف کی 36 ویں بٹالین کے سب انسپکٹر (جنرل ڈیوٹی) پردیپ سنگھ کو بائیں ٹانگ میں گولی لگی۔ انہیں سیناپتی ہسپتال لے جایا گیا۔ یہ فائرنگ اس وقت ہوئی جب نامعلوم شرپسندوں نے مختلف برادریوں سے تعلق رکھنے والے دو گھروں کو جلا دیا۔ پولیس ذرائع نے بتایا کہ ایک گھر کا تعلق کوکی برادری کے ایک فرد سے تھا، جبکہ دوسرا گھر پومائی ناگا برادری کے ایک فرد سے تھا۔

صورتحال پر قابو پانے اور تشدد میں اضافے کو روکنے کے لیے ٹیپوہو کے علاقے میں اضافی حفاظتی دستے تعینات کیے گئے ہیں۔

مقامی لوگوں نے الزام لگایا ہے کہ مسلح کوکی گروہ لیانگ مائی ناگا گاؤں پر حملہ کر رہے تھے۔ اس واقعے کے خلاف احتجاج میں لوگوں نے سیناپتی ہیڈکوارٹر کے قریب قومی شاہراہ-2 کو بلاک کر دیا، جو امپھال کو دیما پور سے جوڑتا ہے۔ مظاہرین نے ہائی وے پر ٹائر جلا دیے۔

تاپوہاؤ کوکی ولیج اتھارٹی نے گھر جلانے کے واقعے کی مذمت کرتے ہوئے اسے انتہائی قابل مذمت، غیر انسانی اور ناقابل قبول قرار دیا۔ انہوں نے ضلعی انتظامیہ اور پولیس سے مطالبہ کیا کہ وہ مجرموں کی شناخت کریں اور قانونی کارروائی کریں۔

تشدد کے کئی واقعات کے بعد علاقے میں ناگا اور کوکی برادریوں کے درمیان کشیدگی پہلے ہی بڑھ گئی ہے۔ اس سے قبل 13 مئی کو نونی اور کانگپوکپی اضلاع میں نامعلوم مسلح افراد نے دو الگ الگ گھات لگا کر حملہ کیا تھا۔ اس وقعہ کے بعد علاقے میں کشیدگی میں اضافہ ہوگیا تھا۔

ہندوستھان سماچار

--------