گوہاٹی، 16 اگست (ہ س )۔ آسام میں سیلاب کا اثر اب پانچ اضلاع تک محدود ہو گیا ہے۔ صورتحال تیزی سے بہتر ہو رہی ہے۔ تمام دریا خطرے کے نشان سے نیچے بہہ رہے ہیں۔ متاثرہ افراد زندگی کو دوبارہ پٹری پر لانے کی پوری کوشش کر رہے ہیں۔ حکومت مدد کے لیے ہر ممکن کوشش کر رہی ہے۔ انتظامیہ بنیادی طور پر اسکولوں کے نظام کو دوبارہ پٹری پر لانے کے لیے ضروری اقدامات کر رہی ہے۔ سیلاب سے متاثرہ لوگوں کو ایک بڑے چیلنج کا سامنا ہے۔

آسام اسٹیٹ ڈیزاسٹر مینجمنٹ اتھارٹی کے 15 اگست تک کے اعداد و شمار کے مطابق تمام دریا خطرے کے نشان سے نیچے بہہ رہے ہیں۔ سیلاب میں ہلاکتوں کی تعداد 105 تک پہنچ گئی ہے۔ سیلاب کی وجہ سے سب سے زیادہ نقصان شیوساگر ضلع کو پہنچا ہے۔ متاثرہ اضلاع گولہ گھاٹ، ہوجای، ناگاؤں، شیوساگر اور جورہاٹ ہیں۔ ان اضلاع کے 16 تحصیلوں کے کل 235 گاؤں متاثر ہیں۔ اس وقت ریاست کے کل 62443 لوگ اب بھی متاثر ہیں اور بیشتر زرعی زمین زیر آب ہے۔

ریاستی حکومت اب بھی سیلاب سے متاثرہ لوگوں کے لیے 28 امدادی کیمپوں اور 9 امدادی تقسیم مراکز سمیت کل 37 کیمپوں کی دیکھ بھال کرتی ہے۔ 4877 افراد امدادی کیمپوں میں پناہ لئے ہوئے ہیں۔ ایس ڈی آر ایف، ڈی ڈی آر ایف، پولیس، فائر بریگیڈ اور دیگر ایجنسیاں سیلاب سے بچاؤ اور امدادی کارروائیوں میں مصروف ہیں۔ سیلاب نے سڑکوں، پلوں اور دیگر بنیادی ڈھانچے کو بڑے پیمانے پر نقصان پہنچایا ہے۔

ہندوستھان سماچار

--------

ہندوستان سماچار / عبدالواحد