تیجسوی یادو بہار کے لوگوں کے لیے سنجیدہ نہیں ہیں: زماں خان

پٹنہ، 14 اگست (ہ س)۔ نائب وزیر اعلیٰ بجیندر پرساد یادو نے کہا کہ حکومت نے بھرت تیواری معاملہ میں ایک ریٹائرڈ جج کی سربراہی میں عدالتی تحقیقاتی کمیشن تشکیل دیا ہے۔ کمیشن کی عبوری رپورٹ کی بنیاد پر حکومت نے خاندان کے ایک فرد کو سرکاری ملازمت اور مالی امداد فراہم کرنے کا فیصلہ کیا ہے۔ انہوں نے یہ بھی کہا کہ واقعہ میں ملوث اہلکاروں کے خلاف قانونی کارروائی کی جائے گی۔ وہ جمعہ کے روز جنتا دل یونائیٹڈ (جے ڈی یو) کے دفتر میں جن سنوائی کے بعد نامہ نگاروں سے بات کر رہے تھے۔ شرا ب بندی کے بارے میں پوچھے گئے سوال کے جواب میں انہوں نے کہا کہ بابائے قوم مہاتما گاندھی شراب نوشی کے سخت مخالف تھے۔ این ڈی اے حکومت کی شراب بندی پر پالیسی پوری طرح واضح ہے۔ اس کے نفاذ سے معاشرے میں بہت سی مثبت تبدیلیاں آئی ہیں۔ اس قانون کی خلاف ورزی کرنے والوں کے خلاف مسلسل کارروائی جاری ہے اور یہ کارروائی جاری رہے گی۔

وزیر زماں خان نے کہا کہ تیجسوی یادو بہار کو لے کر سنجیدہ نہیں ہیں۔ جب بھی ایوان کا اجلاس ہوتا ہے وہ چھٹیاں گزارنے بیرون ملک چلے جاتے ہیں ۔ وہ اپوزیشن لیڈر کے طور پر اپنی ذمہ داریاں نبھانے میں مکمل طور پر ناکام ہو چکے ہیں۔انہوں نے کہا کہ نتیش کمار نے گزشتہ 20 سالوں میں ہم آہنگی اور بھائی چارے کے راستے پر چل کر بہار کو ترقی کی نئی بلندیوں پر پہنچایا ہے۔ اب وزیر اعلیٰ سمراٹ چودھری کی قیادت میں این ڈی اے حکومت اسی وژن اور عزم کے ساتھ عوامی فلاح و بہبود کے لئے مسلسل کام کر رہی ہے۔ جن سنوائی میں وزراء نے ریاست کے مختلف اضلاع سے تعلق رکھنے والے شکایت کنندگان کے مسائل کو سنجیدگی سے سنا اور ان کے قانونی اور فوری حل کے لیے متعلقہ حکام کو ضروری رہنمائی فراہم کی۔ قانون ساز کونسل میں حکمراں جماعت کے چیف وہپ سنجے کمار سنگھ عرف گاندھی جی اور ریاستی جنرل سکریٹری اور ہیڈ کوارٹر انچارج ارون ورما پروگرام کو مربوط کرنے کے لیے موجود تھے۔

ہندوستھان سماچار

ہندوستان سماچار / Mohammad Afzal Hassan