ممبئی۔پونے، ممبئی۔ناسک اور ممبئی۔گوا شاہراہیں بھی لینڈ سلائیڈنگ سے متاثرممبئی ، 6 جولائی (ہ س)۔ مہاراشٹر میں گزشتہ 6 دنوں سے جاری موسلا دھار بارش کے باعث پیر کو ریاست کے مختلف حصوں میں 8 مقامات پر لینڈ سلائیڈنگ کے واقعات پیش آئے۔ ان میں سب سے بڑا حادثہ پونے ضلع کے ماول تعلقہ کے پاٹن گاؤں میں پیش آیا، جہاں مٹی کا تودہ ایک مکان پر گرنے سے 3 افراد جاں بحق ہو گئے، جبکہ 3 دیگر افراد کو بحفاظت نکال لیا گیا۔ ریاست کے دیگر متاثرہ علاقوں میں بھی امدادی اور بچاؤ کارروائیاں جاری ہیں۔پونے ضلع اطلاعاتی محکمہ کے مطابق شدید بارش کے باعث وساپور قلعے کے دامن میں واقع پاٹن گاؤں میں پہاڑی کا ایک حصہ اچانک کھسک کر ایک رہائشی مکان پر آ گرا۔ اطلاع ملتے ہی نیشنل ڈیزاسٹر ریسپانس فورس، مقامی پولیس اور ضلعی انتظامیہ کی مشترکہ امدادی ٹیمیں موقع پر پہنچ گئیں اور بڑے پیمانے پر تلاش اور بچاؤ مہم شروع کی گئی۔دن بھر جاری رہنے والی کارروائی کے دوران ملبے سے مجموعی طور پر 6 افراد کو باہر نکالا گیا۔ ان میں سے 3 افراد جاں بحق ہو چکے تھے، جبکہ دیگر 3 زخمیوں کو سرکاری اسپتال میں داخل کرایا گیا، جہاں ان کا علاج جاری ہے۔ دوسری جانب ممبئی۔پونے شاہراہ کے داخلی مقام پر بھی لینڈ سلائیڈنگ کے باعث شاہراہ کو مکمل طور پر بند کر دیا گیا۔ اسی طرح ممبئی۔ناسک شاہراہ پر ایک مقام پر زمین کھسکنے سے ملبہ قریب واقع ایک مکان پر جا گرا، جس کے نتیجے میں 3 افراد زخمی ہو گئے۔ممبئی۔گوا شاہراہ پر بھی لینڈ سلائیڈنگ کے باعث کچھ وقت کے لیے ٹریفک معطل رہی، تاہم ملبہ ہٹانے کے بعد شاہراہ کو دوبارہ آمدورفت کے لیے کھول دیا گیا۔ حکام کے مطابق ریاست کے دیگر مقامات پر بھی زمین کھسکنے کے واقعات کے بعد امدادی اور بچاؤ کارروائیاں مسلسل جاری ہیں اور متعلقہ ادارے صورتحال پر کڑی نظر رکھے ہوئے ہیں۔ہندوستھان سماچار

ہندوستان سماچار / جاوید این اے