شملہ، 04 جولائی (ہ س)۔ ہماچل پردیش میں آنے والے چند دنوں میں مانسون کافی سرگرم رہنے کے امکانات ہیں۔ راجدھانی شملہ اور آس پاس کے علاقوں میں آج صبح سے ہلکی بارش ہو رہی ہے۔ محکمہ موسمیات نے 6 اور 7 جولائی کے لیے کئی اضلاع میں شدید سے بہت شدید بارش کا اورنج الرٹ جاری کیا ہے۔ محکمے نے لوگوں کو ندی نالوں کے قریب نہ جانے، لینڈ سلائیڈ کے خطرے والے علاقوں سے دور رہنے اور موسم کی معلومات لے کر ہی سفر کرنے کی ہدایت دی ہے۔ دوسری طرف، مانسون کے دوران ریاست میں اب تک 14 افراد کی موت ہو چکی ہے۔ کئی سڑکیں، بجلی اور پینے کے پانی کی خدمات بھی متاثر ہوئی ہیں۔

محکمہ موسمیات کے مطابق آج ریاست میں کئی مقامات پر ہلکی سے درمیانی بارش ہونے کا امکان ہے۔ اس دن سولن اور سیرمور اضلاع میں شدید بارش کا یلو الرٹ جاری کیا گیا ہے۔ 5 جولائی کو بھی زیادہ تر علاقوں میں بارش جاری رہنے کا امکان ہے۔ اس دن کنگڑا، منڈی، شملہ اور سیرمور اضلاع میں شدید بارش کا یلو الرٹ رہے گا۔

سب سے زیادہ تشویش 6 اور 7 جولائی کو لے کر ظاہر کی گئی ہے۔ 6 جولائی کو کنگڑا، منڈی، شملہ اور سیرمور اضلاع میں شدید سے بہت شدید بارش کا اورنج الرٹ جاری کیا گیا ہے۔ اسی دن اونا، ہمیرپور، چمبا اور کلو اضلاع میں شدید بارش کا یلو الرٹ رہے گا۔ 7 جولائی کو کنگڑا، منڈی، شملہ، سیرمور اور ہمیرپور اضلاع کے لیے بھی اورنج الرٹ جاری کیا گیا ہے۔ بلاسپور، اونا، چمبا، کلو اور سولن اضلاع میں شدید بارش کا یلو الرٹ رہے گا۔ 8 اور 9 جولائی کو بھی ریاست کے مختلف حصوں میں شدید بارش کا امکان ہے اور ان دونوں دنوں کے لیے یلو الرٹ جاری کیا گیا ہے۔

10 جولائی کو فی الحال کسی قسم کی وارننگ جاری نہیں کی گئی ہے، تاہم کئی مقامات پر بارش کی سرگرمیاں جاری رہ سکتی ہیں۔

گزشتہ 24 گھنٹوں کے دوران مانسون کی رفتار کچھ سست رہی اور ریاست کے زیادہ تر حصوں میں وسیع بارش ریکارڈ نہیں کی گئی۔ سب سے زیادہ 55 ملی میٹر بارش کاسولی میں ریکارڈ کی گئی۔ اس کے بعد منالی میں 51، چمبا کے بھٹیات میں 45.3، دھرم پور (سولن) میں 42.4، شملہ کے سرہان میں 39.5، کوٹ کھائی میں 31.1، چمبا کے سلونی میں 26.2، جوبڑہٹّی میں 25.6، جوٹ میں 21.2، بھرماور میں 16.2 اور اونا کے بھرواں میں 14 ملی میٹر بارش ریکارڈ کی گئی۔

شملہ، جوبڑہٹّی، سُندر نگر، کنگڑا اور کوفری میں گرج چمک کے ساتھ بجلی کڑکنے کے واقعات بھی رپورٹ ہوئے۔ کہیں بھی اولے یا برفباری نہیں ہوئی۔

ریاستی ایمرجنسی آپریشن سینٹر کے مطابق جمعہ شام تک ریاست میں 49 سڑکیں بند تھیں۔ تین بجلی کے ٹرانسفارمر اور 23 پینے کے پانی کی اسکیمیں بھی متاثر رہیں۔

30 جون سے شروع ہونے والے مانسون سیزن میں اب تک بارش سے متعلق واقعات میں 14 افراد جاں بحق ہو چکے ہیں جبکہ 24 افراد زخمی ہوئے ہیں۔ مرنے والوں میں پانچ افراد پھسلنے سے، ایک شخص بہہ کر، تین افراد کرنٹ لگنے سے، دو افراد سڑک حادثات میں اور تین دیگر وجوہات سے جان کی بازی ہار گئے۔ اس دوران نو کچے مکانات اور پانچ مویشی باڑے مکمل طور پر تباہ ہو چکے ہیں۔

محکمہ موسمیات اور انتظامیہ نے لوگوں سے آئندہ چند دنوں میں خصوصی احتیاط برتنے کی اپیل کی ہے۔ لوگوں کو خراب موسم کے دوران غیر ضروری سفر سے بچنے، ندی نالوں اور لینڈ سلائیڈ کے خطرے والے علاقوں سے دور رہنے اور مقامی انتظامیہ کی ہدایات پر عمل کرنے کی ہدایت دی گئی ہے۔

ہندوستھان سماچار

---------------

ہندوستان سماچار / عبدالواحد