نئی دہلی، 31 جولائی (ہ س)۔ وزیر اعظم نریندر مودی یکم اگست کو آندھرا پردیش اور کرناٹک کے ایک روزہ دورے پر ہوں گے۔ اس دوران وہ دونوں ریاستوں کے بنیادی ڈھانچے، ٹیکنالوجی اور ثقافتی ترقی سے متعلق اسکیموں کا سنگ بنیاد رکھیں گے۔ اس دوران بہت سی اسکیمیں قوم کے لیے وقف کی جائیں گی۔

وزیر اعظم کے دفتر کے مطابق کل صبح تقریبا 11 بجے وزیر اعظم مودی آندھرا پردیش کے وجیانگرم ضلع کے بھوگا پورم میں الوری سیتارام راجو بین الاقوامی ہوائی اڈے کی مسافر ٹرمینل عمارت کا معائنہ کریں گے۔ تقریبا 11بج کر30 منٹ پر وہ بھوگا پورم میں ہوائی اڈے کا افتتاح کریں گے اور 17,900 کروڑ روپے سے زیادہ کے متعدد ترقیاتی منصوبوں کا سنگ بنیاد رکھیں گے۔ وہ اس موقع پر اجتماع سے خطاب بھی کریں گے۔ اس کے بعد، تقریبا 3بج کر30 منٹ پر، وزیر اعظم سری رام کرشن آشرم، میسور میں سوامی وویکانند کلچرل یوتھ سینٹر وویک سمارک کا افتتاح کریں گے۔ وہ اس موقع پر اجتماع سے خطاب بھی کریں گے۔

اس دوران ، وزیر اعظم وشاکھاپٹنم میں 460 کروڑ روپے سے زیادہ کی سرمایہ کاری سے تیار کیے جانے والے اے ایس آئی پی سیمی کنڈکٹر پروجیکٹ کا سنگ بنیاد رکھیں گے۔ یہ پلانٹ جنوبی کوریا کے اے پی اے سی ٹی کے ساتھ شراکت میں اے ایس آئی پی ٹیکنالوجیز پرائیویٹ لمیٹڈ کے ذریعے تیار کیا جا رہا ہے۔ یہ آندھرا پردیش کا پہلا سیمی کنڈکٹر مینوفیکچرنگ پلانٹ ہے جسے انڈیا سیمی کنڈکٹر مشن کے تحت منظوری ملی ہے۔

اس کے علاوہ، وزیر اعظم 1,880 کروڑ روپے سے زیادہ کے قومی شاہراہوں سمیت دیگر پروجیکٹوں کو قوم کے نام وقف کریں گے۔ پبلک پرائیویٹ پارٹنرشپ (پی پی پی) ماڈل کے تحت 5,640 کروڑ روپے سے زیادہ کی لاگت سے تیار کیا گیا، گرین فیلڈ ہوائی اڈہ سالانہ 60 لاکھ مسافروں کی سہولت کے لیے ڈیزائن کیا گیا ہے۔

ہوائی اڈے کو آرٹیفیشل انٹیلی جنس (اے آئی)، بلڈنگ انفارمیشن ماڈلنگ (بی آئی ایم)، ایئر سائیڈ 4.0 ٹیکنالوجی، ایئرپورٹ پریڈیکٹو آپریشن سینٹر (اے پی او سی)، بائیو میٹرک ٹریولرپروسیسنگ، آٹومیٹڈ بیگیج ہینڈلنگ سسٹم، اور انٹیلیجنٹ آپریشنل نگرانی حل جیسی جدید ٹیکنالوجیز سے لیس کیا گیا ہے۔ ان نظاموں سے آپریشنل کارکردگی میں اضافہ، مسافروں کے آرام اور حفاظت کو بہتر بنانے اور وسائل کے زیادہ سے زیادہ استعمال کی توقع کی جارہی ہے۔ ٹرمینل گرین بلڈنگ کے معیار کے مطابق ڈیزائن کیا گیا ہے اور یو ایس گرین بلڈنگ کونسل کے ساتھ رجسٹرڈ ہے۔ ہوائی اڈے کا تعمیراتی ڈیزائن آندھرا پردیش کے ثقافتی ورثے سے متاثر ہے۔

ہندوستھان سماچار

---------------

ہندوستان سماچار / عبدالسلام صدیقی