ممبئی ، 28 جولائی (ہ س) بحیرۂ عرب میں ہوا کے فعال نظام کے باعث مہاراشٹر کے موسم میں نمایاں تبدیلی دیکھی جا رہی ہے۔ محکمہ موسمیات نے ریاست کے 22 اضلاع میں تیز اور موسلادھار بارش کی پیش گوئی کرتے ہوئے الرٹ جاری کیا ہے۔ شہریوں سے محتاط رہنے اور متعلقہ سرکاری ایجنسیوں کو چوکس رہنے کی ہدایت دی گئی ہے۔

محکمہ موسمیات نے رتناگیری ضلع کے لیے اورنج الرٹ جبکہ ممبئی کے لیے یلو الرٹ جاری کیا ہے۔ ماہرین کے مطابق مانسون کی سرگرمیوں میں نمایاں اضافہ ہوا ہے اور آئندہ چند دنوں کے دوران ریاست کے مختلف علاقوں میں اچھی بارش کا امکان ہے۔ محکمہ موسمیات کے مطابق کونکن ساحل کے قریب بحیرۂ عرب میں چکرواتی ہواؤں کا نظام فعال ہے، جس کے باعث ساحلی علاقوں میں 40 سے 50 کلومیٹر فی گھنٹہ کی رفتار سے تیز ہوائیں چل سکتی ہیں۔ آج سے آئندہ چار دنوں تک کونکن خطے میں بارش کی شدت مزید بڑھنے کا امکان ہے۔

اسی دوران سمندر میں شدید طغیانی برقرار رہنے اور چار میٹر تک بلند لہریں اٹھنے کی پیش گوئی کی گئی ہے۔ محکمہ موسمیات نے ماہی گیروں کو سختی سے ہدایت دی ہے کہ وہ اس دوران سمندر میں جانے سے گریز کریں۔ اعداد و شمار کے مطابق جون سے اب تک ریاست میں اوسط سالانہ بارش کا تقریباً 50 فیصد حصہ ریکارڈ کیا جا چکا ہے، جبکہ آئندہ دنوں میں مزید بارش ہونے کی توقع ظاہر کی جا رہی ہے۔ محکمہ موسمیات نے ریاست کے مجموعی طور پر 22 اضلاع کے لیے الرٹ جاری کیا ہے، جن میں ممبئی بھی شامل ہے۔ حکام کے مطابق اگرچہ ممبئی میں موسم اچانک تبدیل ہو سکتا ہے، تاہم شہریوں کو موسم سے متعلق تازہ اطلاعات پر مسلسل نظر رکھنے کا مشورہ دیا گیا ہے۔

دوسری جانب گزشتہ چند دنوں کے دوران پالگھر ضلع میں موسلادھار بارش سے بڑے پیمانے پر نقصان پہنچا ہے۔ صورتحال کا جائزہ لینے کے لیے منگل کو وزیر اعلیٰ دیویندر فڑنویس کی موجودگی میں ایک اہم جائزہ اجلاس منعقد ہوا۔ اجلاس میں بارش سے متاثرہ علاقوں میں راحت اور بازآبادکاری کے اقدامات، پنچنامہ کی کارروائی، زرعی شعبے اور بنیادی ڈھانچے کو پہنچنے والے نقصانات کا جائزہ لینے کے علاوہ متاثرہ شہریوں کو فوری امداد فراہم کرنے کے اقدامات پر تفصیلی تبادلۂ خیال کیا گیا۔

ہندوستھان سماچار

--------------------

ہندوستان سماچار / جاوید این اے