اے ایم یو کے فیکلٹی ممبر نے آئی آئی ٹی بمبئی میں خطبہ پیش کیا
علی گڑھ، 28 جولائی (ہ س)۔ علی گڑھ مسلم یونیورسٹی کے شعبہ نفسیات کے پروفیسر ایس ایم خان نے انڈین انسٹی ٹیوٹ آف ٹکنالوجی (آئی آئی ٹی) بمبئی کی فیکلٹی آف ہیومینٹیز اینڈ سوشل سائنسز کی سائیکوفزیالوجی لیبارٹری میں ایک خطبہ پیش کیا، جہاں انہوں نے اساتذہ اور ریسرچ اسکالرز سے تبادلہ خیال کرتے ہوئے شخصیت کے تجزیے سے متعلق اپنی جاری تحقیق کو تفصیل سے پیش کیا۔
پروفیسر ایس ایم خان کی تحقیق ‘‘ڈسکوری آف سیلف’’، ایک سائیکومیٹرک پیمائشی آلہ ہے جو کارل جنگ کی شخصیتی ترجیحات کی تھیوری پرمبنی ہے۔ یہ آلہ شخصیت کے چار بنیادی پہلوؤں: توانائی کی سمت، معلومات کی پروسیسنگ، فیصلہ سازی اور ساختی موافقت کا جائزہ لے کر کسی فرد کے نفسیاتی رجحانات اور خصوصیات کے بارے میں بصیرت فراہم کرتا ہے۔
اس سیشن کے دوران اس آلے کا آن لائن استعمال کرایا گیا، شرکاء کی نفسیاتی شخصی پروفائلز کی انفرادی تشریح پیش کی گئی، اور تعلیمی دستیابی اور پیشہ ورانہ کامیابی میں شخصیت کی ترجیحات کے کردار پر تفصیلی تبادلہ خیال بھی ہوا۔ پروفیسر عزیز الدین خان نے مقرر کا تعارف کرایا اور سائیکوفزیالوجی لیبارٹری کے دورے میں بھی تعاون کیا۔ اس موقع پر صنعتی شعبے میں استعمال کے لیے نفسیاتی پیمائشی آلات کی تیاری اور ان کی معیار سازی کے سلسلے میں مستقبل میں علمی اشتراک و تعاون کے امکانات پر بھی غور کیا گیا۔
ہندوستھان سماچار
---------------
ہندوستان سماچار / سید کامران علی گڑھ
28 Jul 2026
