علی گڑھ, 28 جولائی (ہ س)علی گڑھ مسلم یونیورسٹی کے شعبہ آرکیٹیکچر کے ریسرچ اسکالرز اور اساتذہ نے برطانیہ کی یونیورسٹی آف کیمبرج کے کنگز کالج میں 20 تا 23 جولائی منعقدہ باوقار گلف ریسرچ میٹنگ 2026 میں یونیورسٹی کی نمائندگی کی۔

اس موقع پر ریسرچ اسکالرز ابھیشیک بھاردواج اور زینب راؤ نے ‘‘ورٹیکل رائیولریز: ریاض اور دبئی کے شہروں کے درمیان بلند و بالا عمارتوں کی مسابقت’’ کے عنوان پر اپنا تحقیقی مقالہ پیش کیا۔ یہ تحقیق شعبہ آرکیٹیکچر کے پروفیسر محمد فرحان فاضلی اور پروفیسر محمد خالد حسن کی رہنمائی میں انجام دی گئی۔

اس تحقیق کو ورکشاپ کے ڈائریکٹرز پروفیسر گیرڈ نونیمن اور ڈاکٹر گلنار اسکندر کی جانب سے بھرپور پذیرائی حاصل ہوئی، جنہوں نے اس کی جدت اور عصری اہمیت کو سراہا۔ اس تحقیق میں بلند و بالا عمارتوں کی تعمیر اور شہروں کی افق نما ساخت میں آنے والی تبدیلیوں کے ذریعہ خلیجی شہروں کے درمیان بدلتے ہوئے شہری مسابقتی رجحانات کا جائزہ لیا گیا ہے۔

یہ تحقیقی مقالہ ایک معروف بین الاقوامی تحقیقی جریدے میں اشاعت کے لیے منظور کر لیا گیا ہے۔ یہ دستیابی شعبہ آرکیٹیکچر کی بین الاقوامی علمی سطح پر بڑھتی ہوئی موجودگی اور معیاری تحقیق کے فروغ کے تئیں اس کے عزم کی عکاس ہے۔

شعبہ آرکیٹیکچر کی چیئرپرسن پروفیسر شرمین خان نے ابھیشیک بھاردواج اور زینب راؤ کو باوقار گلف ریسرچ میٹنگ میں تحقیقی مقالہ پیش کرنے پر مبارکباد پیش کی۔ انہوں نے اس علمی دستیابی کو شعبہ آرکیٹیکچر اور یونیورسٹی کے لیے باعثِ فخر قرار دیا۔

ہندوستھان سماچار

---------------

ہندوستان سماچار / سید کامران علی گڑھ