جموں, 28 جولائی (ہ س)۔ جموں و کشمیر حکومت نے انتظامیہ کو مزید شفاف، مؤثر اور ڈیجیٹل بنانے کی سمت ایک اہم قدم اٹھاتے ہوئے تمام انتظامی محکموں میں ڈیٹا اسٹریٹیجی یونٹ قائم کرنے کی منظوری دے دی ہے۔ اس سلسلے میں جنرل ایڈمنسٹریشن ڈپارٹمنٹ کی جانب سے باضابطہ حکم نامہ جاری کر دیا گیا ہے۔سرکاری حکم نامے کے مطابق ہر محکمہ میں قائم ہونے والے ڈیٹا اسٹریٹیجی یونٹ کی سربراہی متعلقہ انتظامی سکریٹری کریں گے، جبکہ منصوبہ بندی یونٹ کے سربراہ، اکاؤنٹس یونٹ کے سربراہ، اسپیشل یا ایڈیشنل سکریٹری سطح کے افسران اور محکمہ اطلاعاتی ٹیکنالوجی (آئی ٹی) کے نمائندے اس کے ارکان ہوں گے۔

حکومت نے ہر محکمہ کی منصوبہ بندی یونٹ کے سربراہ کو چیف ڈیٹا آفیسر مقرر کیا ہے، جبکہ اس پورے نظام کے لیے محکمہ اقتصادیات و شماریات کو نوڈل ایجنسی کی ذمہ داری سونپی گئی ہے۔

سرکاری حکم کے مطابق ڈیٹا اسٹریٹیجی یونٹ متعلقہ محکموں میں دستیاب ڈیٹا اور ڈیٹا سیٹس کی نشاندہی کرے گا، انہیں باقاعدگی سے اپ ڈیٹ رکھنے، میٹا ڈیٹا تیار کرنے اور ڈیٹا کے معیار کو برقرار رکھنے کا کام انجام دے گا۔ اس کے علاوہ مختلف محکموں کے درمیان ڈیٹا کے مؤثر تبادلے، انٹرآپریبلٹی اور مقررہ ڈیٹا معیارات پر عمل درآمد کو بھی یقینی بنایا جائے گا۔چیف ڈیٹا آفیسر محکمہ جاتی ڈیٹا کی درستگی اور تصدیق کی نگرانی کریں گے، ڈیٹا شیئرنگ کی منظوری دیں گے، جبکہ رازداری، سیکورٹی اور پرائیویسی سے متعلق تمام ضوابط پر عمل درآمد کو بھی یقینی بنائیں گے۔ وہ یونٹ کی باقاعدہ میٹنگز منعقد کرنے اور نوڈل ایجنسی کے ساتھ رابطہ برقرار رکھنے کے بھی ذمہ دار ہوں گے۔

ادھر محکمہ اقتصادیات و شماریات جموں و کشمیر میں ڈیٹا ہارمونائزیشن کے لیے ایک خصوصی سیل قائم کرے گا، جو ڈیٹا اور میٹا ڈیٹا کے معیارات وضع کرنے، اسٹیٹ ڈیٹا کیٹلاگ تیار کرنے، ڈیٹا کے معیار کو بہتر بنانے، مختلف محکموں کے درمیان ڈیٹا شیئرنگ کو فروغ دینے، ڈیٹا ہارمونائزیشن پورٹل تیار کرنے اور متعلقہ محکموں کو تکنیکی رہنمائی فراہم کرنے کے ساتھ ساتھ تربیتی و بیداری پروگرام بھی منعقد کرے گا۔

ہندوستھان سماچار

---------------

ہندوستان سماچار / محمد اصغر