جموں،28 جولائی (ہ س)۔

سالانہ شری امرناتھ یاترا کے سلسلے میں منگل کی علی الصبح 3,029 تیرتھ یاتریوں پر مشتمل اکیسواں جتھہ سخت حفاظتی انتظامات کے درمیان بھگوتی نگر یاتری نیواس، جموں سے بالتل بیس کیمپ کے لیے روانہ ہوا۔

سرکاری حکام کے مطابق جتھہ صبح 2 بجکر 45 منٹ پر 151 گاڑیوں پر مشتمل تھا، جن میں 57 بسیں، 30 درمیانی موٹر گاڑیاں، 58 ہلکی موٹر گاڑیاں اور 6 دو پہیہ گاڑیاں شامل تھیں۔ روانہ ہونے والے یاتریوں میں 2,310 مرد، 590 خواتین، 14 بچے، 45 سادھو، 40 سادھویاں اور 30 غیر ملکی مرد یاتری شامل ہیں۔ حکام نے بتایا کہ منگل کو پہلگام راستے سے کسی بھی قافلے کی روانگی مقرر نہیں تھی۔

انہوں نے کہا کہ قافلہ سخت سیکورٹی حصار میں بالتل بیس کیمپ کی جانب روانہ ہوا ہے اور موسم اور ٹریفک کی صورتحال کے مطابق جموں۔سرینگر قومی شاہراہ سے گزرے گا۔ حکام کے مطابق تازہ قافلے کی روانگی کے ساتھ رواں سال جموں کے بھگوتی نگر یاتری نیواس سے شری امرناتھ یاترا کے لیے روانہ ہونے والے یاتریوں کی مجموعی تعداد بڑھ کر 1 لاکھ 30 ہزار 355 ہو گئی ہے۔

ہندوستھان سماچار

ہندوستان سماچار / محمد اصغر