نئی دہلی، 26 جولائی (ہ س)۔

وزیر اعظم نریندر مودی نے ہندوستانی خاتون کھلاڑی اناہت سنگھ کو ورلڈ جونیئر اسکواش چیمپئن شپ 2026 کا خطاب جیتنے پر مبارکباد دی اور ان کی اس کامیابی کو ہندوستانی کھیلوں کی تاریخ کا ایک قابل فخر لمحہ قرار دیا۔ کناڈا میں منعقدہ چمپئن شپ کے خواتین کے سنگلز فائنل میں، اناہت نے مصر کی رقیہ سالم کو سیدھے گیمز میں 11-3، 11-7، 11-9 سے شکست دے کر طلائی تمغہ جیتا۔

اس تاریخی فتح کے ساتھ ہی 18 سالہ اناہت ورلڈ جونیئر اسکواش چیمپئن بننے والی پہلی ہندوستانی کھلاڑی بن گئیں۔ انہوں نے گزشتہ 15 برسوں سے مصر کے مقابلے میں غلبہ کا خاتمہ بھی کیا۔

وزیر اعظم مودی نے سوشل میڈیا پلیٹ فارم ایکس پر لکھا، 2026 ورلڈ جونیئر اسکواش چیمپئن شپ میں ایک تاریخی کامیابی۔ طلائی تمغہ جیتنے اور عالمی جونیئر چیمپئن شپ کا خطاب جیتنے والی پہلی ہندوستانی اسکواش کھلاڑی بننے پر اناہت سنگھ پر فخر ہے۔ یہ کامیابی نوجوانوں میں اسکواش کو مزید مقبول بنائے گی۔

قبل ازیں نوجوانوں کے امور اور کھیل کے مرکزی وزیر منسکھ مانڈ ویہ نے بھی اناہت کو مبارکباد دیتے ہوئے ایکس پر لکھا، تاریخ رقم ہو گئی ہے۔ عالمی اسکواش جونیئر چیمپئن شپ جیتنے والی پہلی ہندوستانی بننے پر اناہت سنگھ کو مبارکباد۔ یہ ایک قابل ذکر کامیابی اور ہر ہندوستانی کے لیے فخر کا لمحہ ہے۔

اناہت نے سیمی فائنل تک رسائی حاصل کی تھی اور پچھلے سال اسی مقابلے میں کانسی کا تمغہ جیتا تھا۔ اس بار انہوں نے اپنی کارکردگی کو ایک قدم آگے بڑھاتے ہوئے فائنل میں رقیہ سالم کو شکست دے کر ٹائٹل اپنے نام کیا۔ یہ کامیابی ہندوستانی اسکواش کی تاریخ میں ایک نئے باب کی نشاندہی کرتی ہے۔

ہندوستھان سماچار

ہندوستان سماچار / عطاءاللہ