گلاسگو، 26 جولائی(ہ س)۔ دولتِ مشترکہ کھیل 2026 میں بھارت کے نوجوان ویٹ لفٹر رشیکانتا سنگھ چانمبم نے شاندار کارکردگی کا مظاہرہ کرتے ہوئے مردوں کے 60 کلوگرام ویٹ کیٹیگری میں چاندی کا تمغہ اپنے نام کر لیا۔ اس کامیابی کے ساتھ انہوں نے گلاسگو کھیلوں میں بھارت کو دوسرا تمغہ دلایا۔

منی پور سے تعلق رکھنے والے رشیکانتا نے اسنیچ مرحلے میں 121 کلوگرام وزن اٹھا کر نیا ریکارڈ قائم کیا، جبکہ کلین اینڈ جرک میں 143 کلوگرام وزن کامیابی سے اٹھایا۔ اس طرح انہوں نے مجموعی طور پر 264 کلوگرام (121+143) وزن اٹھا کر دوسرا مقام حاصل کیا۔

سونے کے تمغے کی دوڑ میں برقرار رہنے کے لیے رشیکانتا نے دوسرے اور تیسرے مرحلے میں بالترتیب 148 کلوگرام اور 151 کلوگرام وزن اٹھانے کی کوشش کی، تاہم وہ دونوں کوششوں میں کامیاب نہ ہو سکے۔ اس کے باوجود ان کی مجموعی کارکردگی انہیں چاندی کا تمغہ دلانے کے لیے کافی ثابت ہوئی۔

اس سے قبل بھارت نے ان کھیلوں میں اپنا پہلا تمغہ پیرا پاور لفٹنگ میں حاصل کیا تھا، جہاں جھنڈو کمار نے کانسہ کا تمغہ جیت کر بھارت کا کھاتہ کھولا تھا۔

مردوں کے 60 کلوگرام مقابلے میں ملیشیا کے بن کسدان محمد انیق نے مجموعی طور پر 273 کلوگرام (121+152) وزن اٹھا کر سونے کا تمغہ جیتا۔ انہوں نے اس شاندار کارکردگی کے ساتھ کھیلوں کا نیا ریکارڈ بھی قائم کیا۔

بھارت کے مرکزی وزیر برائے نوجوانان و کھیل منسکھ مانڈویہ نے رشیکانتا سنگھ کو مبارک باد دیتے ہوئے سوشل میڈیا پلیٹ فارم ایکس پر لکھا کہ مردوں کے 60 کلوگرام ویٹ کیٹیگری میں چاندی کا تمغہ جیتنے پر رشیکانتا سنگھ کو دلی مبارک باد، پوری قوم کو ان کی اس شاندار کامیابی پر فخر ہے۔

ہندوستھان سماچار

ہندوستان سماچار / Mohammad Khan