نئی دہلی، 26 جولائی(ہ س)۔ وزیر اعظم نریندر مودی نے اتوار کو’وکست وائبرنٹ ولیج پروگرام 2026‘ کے شرکائ سے ویڈیو کانفرنسنگ کے ذریعے خطاب کرتے ہوئے کہا کہ بھارت کا نوجوان ہی ترقی یافتہ بھارت کی اصل طاقت اور سب سے بڑا فائدہ اٹھانے والا طبقہ ہے۔ انہوں نے کہا کہ اگر نوجوان ملک کے مسائل اور ان کے حل سے براہِ راست وابستہ ہوں تو بھارت کا مستقبل مزید روشن اور مضبوط ہوگا۔

وزیر اعظم نے ملک کے تقریباً 250 اضلاع سے تعلق رکھنے والے نوجوانوں سے بات چیت کرتے ہوئے ان کے تجربات سنے اور کہا کہ زمینی سطح پر عوام سے جڑنے سے نوجوانوں میں قومی خدمت کا جذبہ مضبوط ہوتا ہے اور ترقی یافتہ بھارت کے وژن کو نئی وسعت ملتی ہے۔انہوں نے کہا کہ موجودہ حکومت نے سرحدی دیہات کو ملک کے ’آخری گاؤں‘ کے بجائے ’پہلے گاؤں‘ کا درجہ دیتے ہوئے وہاں بنیادی سہولیات کی فراہمی کو ترجیح دی ہے۔ ان کا کہنا تھا کہ ان دیہات میں ترقی کی شدید خواہش اور حب الوطنی کا جذبہ نمایاں ہے۔ ماضی میں ان علاقوں کو نظرانداز کیا جاتا تھا، لیکن آج بہتر سڑکیں، رابطے کی سہولیات اور سیاحت کے فروغ نے ان کی تصویر بدل دی ہے۔

وزیر اعظم نے بتایا کہ وکست وائبرنٹ ولیج پروگرام 2026 دو مراحل میں 4 جون سے 30 جون 2026 تک منعقد کیا گیا، جس میں لداخ، ہماچل پردیش اور اتراکھنڈ کے 74 سرحدی دیہات شامل تھے۔ اس پروگرام کے لیے ملک بھر سے آن لائن کوئز مقابلے کے ذریعے 400 سے زائد نوجوانوں کا انتخاب کیا گیا، جبکہ اس مقابلے میں تین لاکھ سے زیادہ نوجوانوں نے حصہ لیا۔

پروگرام کے دوران شرکائ نے مقامی آبادی کے ساتھ رہتے ہوئے صفائی مہم، سرکاری اسکیموں سے متعلق بیداری پروگرام، نوجوانوں کی کانفرنسیں، ثقافتی تبادلے، شجرکاری، پنچایت ماڈل مشق، مقامی ہنرمندوں سے ملاقات اور اہم اسٹریٹجک اداروں کے دورے جیسی سرگرمیوں میں حصہ لیا۔

وزیر اعظم نے کہا کہ اس پروگرام نے نوجوانوں کو سرحدی علاقوں کی سماجی، معاشی اور ثقافتی زندگی کو قریب سے سمجھنے کا موقع فراہم کیا، ساتھ ہی قومی یکجہتی، عوامی شراکت داری اور سرحدی دیہات کی اسٹریٹجک اہمیت سے بھی روشناس کرایا۔

ہندوستھان سماچار

ہندوستان سماچار / Mohammad Khan