مغربی سنگھ بھوم، 26 جولائی (ہ س)

مغربی سنگھ بھوم ضلع کے بدنام زمانہ چکردھر پور انسانی اسمگلنگ کیس میں اپنی کارروائی تیز کرتے ہوئے پولس نے مزید تین ملزمین کو گرفتار کیا ہے۔ ان گرفتاریوں کے ساتھ مجموعی طور پر پانچ ملزمان کو عدالتی حراست میں بھیج دیا گیا ہے۔ پولیس کا کہنا ہے کہ وہ انسانی اسمگلنگ کے اس نیٹ ورک میں ملوث دیگر افراد کے کردار کی تفتیش کر رہی ہے۔

اتوار کو چکردھر پور پولیس اسٹیشن کے انچارج اودھیش کمار نے بتایا کہ گرفتار ملزمان میں سانگاجاٹا کے رہنے والے بدھرام گوپ، گڈاسائی کے رہنے والے دوریودھن کمار عرف برجو اور بندیرانگروئی کے رہنے والے تورام کنڈیانگ عرف ارون شامل ہیں۔

ابتدائی تحقیقات سے پتہ چلا ہے کہ تینوں نے اپنے اپنے علاقوں کے دیہاتیوں اور معاشی طور پر پسماندہ افراد کو بہتر روزگار اور زیادہ اجرت کا وعدہ کر کے ورغلایا۔ اس کے بعد انہیں ملازمت فراہم کرنے کے بہانے دوسری ریاستوں میں بھیجا گیا، جس سے ملزمان کو مالی فائدہ پہنچایا گیا۔

یہ معاملہ 17 مئی 2026 کی رات کو اس وقت سامنے آیا جب پویڑاہاٹ کے ایس ڈی پی او ڈاکٹر سید مصطفی ہاشمی کو اطلاع ملی کہ چکردھر پور کے ایک ہوٹل میں کئی لوگوں کو غیر قانونی طور پر حراست میں لیا جا رہا ہے۔ اطلاع کے بعد پولیس سپرنٹنڈنٹ امیت رینو کی ہدایت پر ایک خصوصی ٹیم تشکیل دی گئی۔ چکردھر پور پولیس اسٹیشن نے ڈسٹرکٹ لیگل سروسز اتھارٹی، لیبر ڈپارٹمنٹ، کررا سوسائٹی فار رورل ایکشن اور چائلڈ لائن کے ساتھ مشترکہ چھاپہ مار کر ہوٹل سے 30 مرد و خواتین مزدوروں اور چھ نابالغ بچوں کو بحفاظت بچایا۔بازیاب کرائے گئے بچوں میں پانچ لڑکے اور ایک لڑکی شامل ہے۔

تحقیقات کے دوران یہ بات سامنے آئی کہ تمام مزدوروں اور بچوں کو بندھوا مزدوری کے لیے گجرات بھیجنے کی تیاری کی جا رہی تھی۔پولیس نے مزدوروں کو لے جانے کے لیے منتظر بس کو بھی قبضے میں لے لیا۔

اس معاملے میں پولیس نے پہلے گجرات کے موروی کے رہنے والے نکنج گووند بورسانیہ اور راجکوٹ کے رہنے والے نیلیش بھائی شاہ کو گرفتار کرکے جیل بھیج دیا تھا۔ ان دونوں کے خلاف چکردھر پور پولیس اسٹیشن میں انسانی اسمگلنگ سمیت مختلف دفعات کے تحت مقدمہ درج کیا گیا ہے۔

ہندوستھان سماچار

ہندوستان سماچار / عطاءاللہ