صنعاء، 25 جولائی (ہ س)۔

سعودی عرب اور یمن کے درمیان کشیدگی ایک بار پھر بڑھ گئی ہے۔ یمن کی فوج نے سعودی عرب کے جیزان علاقے میں صنعتی ٹھکانوں پر میزائل حملے کرنے کا دعویٰ کیا ہے۔ یمن کا کہنا ہے کہ یہ کارروائی الحدیدہ اور کامران جزیرے پر سعودی فضائی حملوں کے جواب میں کی گئی ہے۔ دونوں فریقوں کی جانب سے مسلسل آ رہی تنبیہات نے علاقے میں تصادم مزید تیز ہونے کا خدشہ بڑھا دیا ہے۔

ایران کی خبر رساں ایجنسی فارس اور دیگر میڈیا رپورٹس کے مطابق، ہفتے کی علی الصبح ان حملوں سے پہلے سعودی فوج نے مغربی یمن کے الحدیدہ میں واقع ایک ٹھکانے اور کامران جزیرے پر متعدد فضائی حملے کیے تھے۔ یمن کا دعویٰ ہے کہ اس کے فضائی دفاعی نظام نے سعودی جنگی طیاروں کو اس کی فضائی حد سے باہر جانے پر مجبور کر دیا۔

حملوں کے بعد یمن کی وزارتِ خارجہ نے سعودی عرب کو سخت تنبیہ کرتے ہوئے کہا کہ اس فوجی کارروائی کے نتائج کی پوری ذمہ داری ریاض حکومت پر ہوگی۔ وزارت نے الزام لگایا کہ یمن پر طویل عرصے سے عائد ناکہبندی ہٹانے کے مطالبے پر غور کرنے کے بجائے سعودی عرب نے فوجی کارروائی کا راستہ منتخب کیا ہے۔

وزارتِ خارجہ نے اپنے بیان میں کہا کہ الحدیدہ پر حملہ علاقائی کشیدگی کو نئے موڑ پر لے جائے گا اور اب ’’حملے کے جواب میں حملہ‘‘ کی پالیسی اپنائی جائے گی۔

وہیں، یمن کی انصار اللہ تحریک کے سینئر رہنما حزام الاسد نے بھی سعودی عرب کو تنبیہ کرتے ہوئے کہا کہ ’’بندرگاہ کے بدلے بندرگاہ، ہوائی اڈے کے بدلے ہوائی اڈا اور ہر حملے کا جواب اس سے بھی بڑے حملے سے دیا جائے گا۔‘‘

اس سے پہلے یمن کی فوج نے اعلان کیا تھا کہ وہ سعودی ٹھکانوں کے خلاف اپنی بحری کارروائیاں جاری رکھے گی۔ فوج نے کہا تھا کہ بحیرۂ احمر میں سعودی تیل کے ٹینکروں کو نشانہ بنانے کی کارروائی اس کی ’’ناکہ بندی کے بدلے ناکہ بندی‘‘ پالیسی کا حصہ ہے۔یمن نے اسی ماہ سعودی عرب کے خلاف بحری ناکہ بندی نافذ کرنے کا اعلان بھی کیا تھا۔ فوجی ترجمان بریگیڈیئر جنرل یحییٰ سریع نے تنبیہ کی تھی کہ سعودی عرب کی جانب سے کسی بھی نئے حملے کا جواب ’’جامع اور سخت کارروائی‘‘ سے دیا جائے گا۔

ہندوستھان سماچار

ہندوستان سماچار / انظر حسن