ہرارے،22جولائی(ہ س)۔

مسلسل ٹی-20 انٹرنیشنل سیریز میں مایوس کن کارکردگی کے بعد بھارتی کرکٹ ٹیم جمعرات سے زمبابوے کے خلاف شروع ہونے والی تین میچوں کی ٹی-20 سیریز میں کامیابی کی راہ پر واپس آنے کے عزم کے ساتھ میدان میں اترے گی۔ کپتان شریس ایئر اپنی قیادت میں پہلی ٹی-20 سیریز جیتنے کی کوشش کریں گے، جبکہ نوجوان بھارتی ٹیم حالیہ ناکامیوں کو پسِ پشت ڈالنے کے لیے پُرعزم ہے۔

شریس ایئر کی کپتانی میں بھارت نے اب تک کھیلے گئے سات ٹی-20 انٹرنیشنل میچوں میں سے چھ میں شکست کھائی ہے۔ آئرلینڈ اور انگلینڈ کے خلاف سیریز میں ناکامی کے بعد زمبابوے کا یہ دورہ ٹیم کے لیے اعتماد بحال کرنے کا اہم موقع تصور کیا جا رہا ہے۔ اگرچہ بھارت اس سیریز میں فیورٹ قرار دیا جا رہا ہے، تاہم شکست کی صورت میں ٹیم کے حوصلوں پر منفی اثر پڑ سکتا ہے۔ اس دورے میں ہیڈ کوچ گوتم گمبھیر کی غیر موجودگی میں وی وی ایس لکشمن ٹیم کی ذمہ داریاں سنبھال رہے ہیں، اس لیے ٹیم کمبی نیشن اور حکمت عملی پر بھی سب کی نظریں ہوں گی۔

نوجوان اوپننگ بلے باز ویبھَو سوریہ ونشی ایک مرتبہ پھر توجہ کا مرکز ہوں گے۔ وہ ابھیشیک شرما کے ساتھ اننگز کا آغاز کریں گے، جبکہ سنجو سیمسن اس دورے کے لیے ٹیم کا حصہ نہیں ہیں۔ہرارے اسپورٹس کلب کا میدان ابھیشیک شرما اور ویبھَو سوریہ ونشی دونوں کے لیے خوشگوار یادیں رکھتا ہے۔ ابھیشیک نے اسی میدان پر اپنا ٹی-20 انٹرنیشنل ڈیبیو کیا تھا اور دوسرے ہی میچ میں سنچری اسکور کی تھی، جبکہ ویبھَو نے رواں برس انڈر-19 ورلڈ کپ کے فائنل میں انگلینڈ کے خلاف اسی میدان پر شاندار سنچری بنائی تھی۔

ہرارے کی وکٹ سے فاسٹ بولرز کو اضافی باؤنس اور مدد ملنے کی توقع ہے، جس کے باعث زمبابوے کے تیز گیند باز بلیسنگ مزاربانی اور رچرڈ نگاراوا بھارتی بلے بازوں کے لیے بڑا چیلنج ثابت ہو سکتے ہیں۔

بھارت کی مڈل آرڈر بیٹنگ بھی زیرِ بحث ہے۔ نائب کپتان تلک ورما کو پانچویں نمبر پر خاطر خواہ کامیابی نہیں ملی، جبکہ ایشان کشن تیسرے نمبر پر بیٹنگ کر رہے ہیں۔ ایسے میں رنکو سنگھ بھی درمیانی بیٹنگ لائن کے لیے مضبوط متبادل سمجھے جا رہے ہیں۔

آل راؤنڈرز میں ہرش دوبے، شیوم دوبے اور سوریانش شیڈگے میں سے دو کھلاڑیوں کا انتخاب ٹیم مینجمنٹ کے لیے آسان نہیں ہوگا، جبکہ فاسٹ بولنگ اٹیک میں مینک یادو، پرنس یادو، اشوک شرما اور یش ٹھاکر میں سے حتمی کمبی نیشن پر بھی سب کی نظریں رہیں گی۔

بھارت: شریاس ایئر (کپتان)، ویبھَو سوریہ ونشی، ابھیشیک شرما، ایشان کشن (وکٹ کیپر)، تلک ورما، شیوم دوبے، ہرش دوبے، سوریانش شیڈگے، یش ٹھاکر، پرنس یادو، میانک یادو، اشوک شرما، روی بشنوئی، پربھسمرن سنگھ، رنکو سنگھ۔

زمبابوے: سکندر رضا (کپتان)، برائن بینیٹ، ریان برل، تناکا چیوانگا، بین کرن، بریڈ ایوانس، ویسلے مدھیویرے، تدیواناشے مارومانی، ویلنگٹن مساکادزا، بلیسنگ مزاربانی، ڈیون مائرس، رچرڈ نگاراوا، نیومین نیامہوری، ملٹن شمبا اور تفادزوا تسیگا۔

ہندوستھان سماچار

ہندوستان سماچار / Mohammad Khan