اسلام آباد،22جولائی(ہ س)۔ پاکستان کے صوبہ پنجاب اور خیبر پختونخوا میں موسلا دھار بارشوں کے باعث سیلاب جیسی صورتحال پیدا ہوگئی ہے، جس کے نتیجے میں کم از کم 23 افراد جاں بحق اور متعدد زخمی ہو گئے ہیں۔ مسلسل بارش کے باعث کئی مکانات منہدم ہو گئے، جبکہ مختلف علاقوں میں سڑکیں زیرِ آب آ گئی ہیں اور بجلی کے کرنٹ لگنے کے بھی کئی واقعات پیش آئے ہیں۔

مقامی میڈیا رپورٹس کے مطابق صوبائی ڈیزاسٹر مینجمنٹ اتھارٹی (پی ڈی ایم اے) نے پنجاب اور خیبر پختونخوا میں بارشوں سے ہونے والے جانی و مالی نقصان کی تفصیلات جاری کی ہیں۔ رپورٹ کے مطابق پنجاب میں اب تک 9 افراد جان کی بازی ہار چکے ہیں، جبکہ درجنوں افراد زخمی ہوئے ہیں۔

لاہور کے قریب رائیونڈ کے علاقے کوٹ بابو خان میں مکان کی چھت گرنے سے ایک شخص جاں بحق اور تین افراد زخمی ہو گئے۔ لاہور کے گلشنِ راوی میں بینڈ روڈ کے قریب ایک اور مکان کی چھت گرنے سے چار افراد زخمی ہوئے۔

پی ڈی ایم اے کے مطابق پاکپتن کے گاؤں 75-ڈی میں ایک خاتون، ہوٹا میں ایک نوجوان اور گجرات میں ایک شخص جان سے ہاتھ دھو بیٹھا۔ گجرات میں چھ افراد جبکہ سیالکوٹ میں مکان گرنے کے مختلف واقعات میں تین افراد زخمی ہوئے۔ گوجرانوالہ میں تین افراد جاں بحق اور 14 زخمی ہوئے، جبکہ بجلی کا کرنٹ لگنے کے تین الگ الگ واقعات میں ایک شخص جاں بحق اور دو افراد زخمی ہوئے۔

ساہیوال میں مکان کی چھت گرنے سے ایک خاتون جاں بحق اور تین افراد زخمی ہوئے۔ منڈی بہاؤالدین میں چھت اور دیوار گرنے کے مختلف حادثات میں آٹھ افراد زخمی ہوئے، جبکہ بہاول نگر میں شیڈ گرنے سے ایک شخص زخمی ہو گیا۔ پنڈی بھٹیاں میں شدید بارش کے باعث سڑکیں زیرِ آب آ گئی ہیں، جبکہ فیصل آباد، بھلوال اور جھنگ کے نشیبی علاقوں میں پانی جمع ہونے سے معمولاتِ زندگی متاثر ہوئے ہیں۔پی ڈی ایم اے نے خبردار کیا ہے کہ پنجاب میں 24 جولائی تک مزید بارشوں کا امکان ہے۔

دوسری جانب خیبر پختونخوا میں بھی شدید بارشوں نے بڑے پیمانے پر تباہی مچائی ہے۔ صوبائی ڈیزاسٹر مینجمنٹ اتھارٹی کے مطابق صوبے میں 14 افراد جاں بحق اور 19 زخمی ہوئے ہیں۔ جاں بحق ہونے والوں میں چھ مرد، چھ بچے اور دو خواتین شامل ہیں۔

بارشوں سے پشاور، نوشہرہ، خیبر، مردان، بونیر، باجوڑ، شانگلہ، صوابی، لوئر چترال، لوئر اور اپر دیر، ایبٹ آباد، مانسہرہ، تورغر، کرم اور شمالی وزیرستان سمیت متعدد اضلاع متاثر ہوئے ہیں، جہاں دریاؤں اور برساتی نالوں میں طغیانی کے باعث سیلابی صورتحال برقرار ہے۔

ہندوستھان سماچار

ہندوستان سماچار / Mohammad Khan