میلبورن، 21 جولائی (ہ س)۔ کرکٹ آسٹریلیا نے منگل کو بنگلہ دیش کے خلاف اگست میں دو میچوں کی ٹیسٹ سیریز کے لیے 13 رکنی ٹیم کا اعلان کر دیا۔ کپتان پیٹ کمنز، فاسٹ بولر جوش ہیزل ووڈ اور تجربہ کار اسپنر نیتھن لیون کی انجری کے بعد ٹیم میں واپسی ہوئی ہے جس سے آسٹریلوی ٹیم کو بڑا حوصلہ ملا ہے۔

ہیزل ووڈ ہیمسٹرنگ انجری سے صحت یاب ہونے کے دوران اکیلس کی انجری کی وجہ سے پوری ایشز سیریز سے باہر ہو گئے تھے۔ وہیںلیون بھی ایڈیلیڈ ٹیسٹ میں ہیمسٹرنگ انجری کے باعث سرجری کروانے کے بعد طویل عرصے سے مسابقتی کرکٹ سے باہر تھے۔

پیٹ کمنز، اس دوران، پیٹھ کی اسٹریس انجری کی چوٹ سے واپسی کے بعد صرف ایڈیلیڈ ٹیسٹ میں کھیلے تھے۔ آسٹریلیا کی جانب سے ایشز برقرار رکھنے کے بعد احتیاطی تدابیر کے طور پر انہیں آخری دو ٹیسٹ کے لیے آرام دیا گیا تھا۔

کمنز اور ہیزل ووڈ بھی ہندوستان اور سری لنکا میں ہونے والے ٹی20 ورلڈ کپ سے محروم رہے، حالانکہ دونوں مختلف اوقات میں آئی پی ایل میں واپس آئے تھے۔ لیون نے ایڈیلیڈ ٹیسٹ کے بعد سے کوئی مسابقتی میچ نہیں کھیلا ہے۔

کرکٹ آسٹریلیا کی طرف سے چیف سلیکٹر جارج بیلی کے حوالے سے کہا گیا کہ قومی سلیکشن کمیٹی پیٹ، جوش اور ناتھن کی واپسی کا خیرمقدم کرتی ہے۔ گزشتہ چند مہینوں کے دوران، تینوں کھلاڑیوں نے اسپورٹس سائنس اور اسپورٹس میڈیسن ٹیموں کے ساتھ مل کر اپنی اپنی انجری سے صحت یاب ہونے کے لیے سخت محنت کی ہے۔

نیسر اور ڈوگیٹ آوٹ

ایشز میں 15 وکٹیں لینے والے مائیکل نیسر اور برینڈن ڈوگیٹ سینئر گیندبازوںکی واپسی کے بعد ٹیم سے باہر ہو گئے ہیں۔ تاہم نیسر، ڈوگیٹ اور آف اسپنر ٹوڈ مرفی مرکزی ٹیم کے ساتھ ٹریننگ کر رہے ہیں اور ضرورت پڑنے پر انہیں ٹیم میں شامل کیا جا سکتا ہے۔

بیلی نے کہا، یہ 13 رکنی ٹیم ہے، لیکن ضرورت پڑنے پر دیگر متبادل کھلاڑی پوری طرح تیار ہیں۔ اگلے 12 ماہ کے دوران مسلسل کرکٹ سے کئی کھلاڑیوں کو تینوں فارمیٹس میں مواقع ملیں گے۔

بیٹنگ آرڈر میں کوئی تبدیلی نہیں کی گئی۔

آسٹریلیا نے ٹاپ آرڈر میں کوئی تبدیلی نہیں کی ہے۔ ایشز میں ڈیبیو کرنے والے جیک ویدرالڈ کو ایک اور موقع دیا گیا ہے اور وہ ٹریوس ہیڈ کے ساتھ اننگز کا آغاز کریں گے، ہیڈکو عثمان خواجہ کی ریٹائرمنٹ کے بعد اوپننگ رول دیا گیا ہے۔

خراب فارم کے ساتھ جدوجہد کرنے والے مارنس لیبوشین کو بھی برقرار رکھا گیا ہے۔ انہوں نے ایشز میں 28.78 کی اوسط سے 259 رن بنائے۔ اس سے قبل انہیں ویسٹ انڈیز کے دورے کے دوران پلیئنگ الیون سے ڈراپ کیا گیا تھا۔

تیزگیندبازی اٹیک میں کمنز اور ہیزل ووڈ کے علاوہ مچل اسٹارک اور سکاٹ بولانڈ بھی شامل ہیں۔ آل راو¿نڈر کیمرون گرین اور بیو ویبسٹر بھی پلیئنگ الیون میں جگہ حاصل کرنے کے دعویدار ہیں۔ ریزرو وکٹ کیپر جوش انگلیس بھی مڈل آرڈر میں جگہ کے لیے مقابلہ کریں گے۔

دونوں ٹیسٹ اگست میں کھیلے جائیں گے۔

ورلڈ ٹیسٹ چیمپئن شپ (ڈبلیو ٹی سی) سائیکل کے حصے کے طور پر دونوں ٹیسٹ میچ ڈارون میں 13 سے 17 اگست اور میکاے میں 22 سے 26 اگست تک کھیلے جائیں گے۔

یہ آسٹریلیا کے لیے مصروف ٹیسٹ شیڈول کا آغاز ہو گا، جس میں ٹیم اگلے آٹھ ماہ میں 14 ٹیسٹ میچ کھیلے گی۔ اس دوران، آسٹریلیا ہندوستان کا دورہ بھی کرے گا اور ٹیسٹ کرکٹ کی 150 ویں سالگرہ کے موقع پر میلبورن کرکٹ گراو¿نڈ میں انگلینڈ کے خلاف ایک خصوصی ٹیسٹ میچ کھیلے گا۔

آسٹریلیا اس وقت ورلڈ ٹیسٹ چیمپئن شپ پوائنٹس ٹیبل پر 87.50 پوائنٹس کے فیصد (پی سی ٹی) کے ساتھ سرفہرست ہے۔ وہ اب تک اپنے آٹھ میچوں میں سے سات جیت چکے ہیں اور ایک ہار چکے ہیں۔

بنگلہ دیش کے خلاف ٹیسٹ سیریز کے لیے آسٹریلیا کا سکواڈ

پیٹ کمنز (کپتان)، اسکاٹ بولانڈ، ایلکس کیری، کیمرون گرین، جوش ہیزل ووڈ، ٹریوس ہیڈ، جوش انگلیس، مارنس لیبوشین، نیتھن لیون، اسٹیو اسمتھ، مچل اسٹارک، جیک ویدرالڈ، بیو ویبسٹر۔

ہندوستھان سماچار

---------------

ہندوستان سماچار / عبدالسلام صدیقی