جموں, 21 جولائی (ہ س)۔ جموں و کشمیر کے ضلع ریاسی میں مسلسل موسلادھار بارش کے باعث دریائے چناب اور سلال ڈیم میں پانی کی آمد میں نمایاں اضافہ ہونے پر منگل کے روز سلال ڈیم کے تمام دروازے کھول دیے گئے۔

حکام کے مطابق گزشتہ کئی گھنٹوں سے جاری شدید بارش کے نتیجے میں ڈیم میں پانی کی سطح تیزی سے بلند ہوئی، جس کے پیش نظر اضافی پانی کے اخراج اور آبی ذخیرے کی سطح کو قابو میں رکھنے کے لیے ڈیم کے تمام دروازے کھولے گئے۔

ڈیم سے بڑے پیمانے پر پانی چھوڑے جانے کے بعد دریائے چناب میں پانی کی سطح اور بہاؤ میں نمایاں اضافہ ریکارڈ کیا گیا۔

انتظامیہ نے دریائے چناب کے کنارے اور نشیبی علاقوں میں رہنے والے لوگوں کو احتیاط برتنے کی ہدایت دیتے ہوئے دریا کے قریب جانے سے گریز کرنے کا مشورہ دیا ہے۔

ادھر، خطے میں گزشتہ چند روز سے وقفے وقفے سے بارش کا سلسلہ جاری ہے، جبکہ متعلقہ محکمے موسم کی صورتحال اور دریائے چناب میں پانی کی سطح پر مسلسل نظر رکھے ہوئے ہیں۔

ہندوستھان سماچار

---------------

ہندوستان سماچار / محمد اصغر