جموں, 02 جولائی (ہ س)۔ جموں و کشمیر میں آئندہ چند روز تک مانسون پوری طرح سرگرم رہے گا۔ محکمۂ موسمیات (آئی ایم ڈی) نے 5 جولائی تک مرکز کے زیر انتظام علاقے میں ہلکی سے درمیانی بارش، گرج چمک، تیز ہواؤں اور بعض مقامات پر موسلا دھار بارش کی پیش گوئی کرتے ہوئے عوام کو احتیاط برتنے کی ہدایت دی ہے۔محکمہ کے مطابق یکم سے 3 جولائی کے دوران جموں ڈویژن کے مختلف اضلاع میں شدید بارش کے باعث فلیش فلڈ، لینڈ سلائیڈ، مٹی کھسکنے اور نشیبی علاقوں میں پانی جمع ہونے کا خدشہ ہے، جبکہ 4 اور 5 جولائی کو بارش کی شدت میں کچھ کمی آئے گی، تاہم مختلف علاقوں میں بارش کا سلسلہ برقرار رہنے کا امکان ہے۔

محکمۂ موسمیات نے کہا ہے کہ آئندہ پانچ دنوں کے دوران 40 سے 50 کلومیٹر فی گھنٹہ کی رفتار سے تیز ہوائیں چل سکتی ہیں، جبکہ بعض مقامات پر ان کی رفتار 60 کلومیٹر فی گھنٹہ تک پہنچ سکتی ہے۔محکمہ نے حساس اور پہاڑی علاقوں میں رہنے والے شہریوں، سیاحوں اور امرناتھ یاترا پر جانے والے زائرین کو خصوصی احتیاط برتنے کا مشورہ دیتے ہوئے لینڈ سلائیڈ اور سیلاب کے خدشات کے پیش نظر غیر ضروری سفر سے گریز کرنے کی اپیل کی ہے۔

ضلع وار انتباہ کے مطابق یکم سے 3 جولائی تک جموں ڈویژن کے بیشتر اضلاع کے لیے اورنج الرٹ جاری کیا گیا ہے، جبکہ وادی کشمیر کے بیشتر اضلاع ییلو الرٹ کے تحت رہیں گے۔ 4 اور 5 جولائی کو الرٹ کی سطح میں کمی متوقع ہے، تاہم مختلف علاقوں میں گرج چمک کے ساتھ بارش کا امکان برقرار رہے گا۔

گزشتہ 24 گھنٹوں کے دوران سب سے زیادہ بارش جموں شہر میں 35.8 ملی میٹر ریکارڈ کی گئی، جبکہ کٹرا، بھدرواہ، بٹوت اور بانہال میں بھی بارش ہوئی۔ دوسری جانب وادی کشمیر کے بیشتر علاقوں میں بارش نہ ہونے کے برابر ریکارڈ کی گئی۔محکمۂ موسمیات نے آئندہ چوبیس گھنٹوں کے دوران بھی جموں و کشمیر کے مختلف علاقوں میں ہلکی سے درمیانی بارش اور گرج چمک کے ساتھ بوندا باندی کی پیش گوئی کی ہے۔

ہندوستھان سماچار

---------------

ہندوستان سماچار / محمد اصغر