دہرادون، 2 جولائی (ہ س)۔ اتراکھنڈ میں بارش کا سلسلہ جاری ہے۔ موسمیاتی مرکز نے آج دہرادون، نینیتال، پوڑی، باگیشور اور ٹہری اضلاع میں بارش کے لیے اورنج الرٹ جاری کیا ہے۔ بارش نے گلاب کوٹی کے قریب بدری ناتھ ہائی وے اور کیدارناتھپیدل یاترا راستہ سونپریاگ-منکٹیہ کے قریب چٹان گرنے کی وجہ سے بند کر دیا ہے۔ مزید ، باگیشور اور الموڑہ اضلاع کے اسکولوں اور آنگن واڑی مراکز میں آج ایک دن کی تعطیل کا اعلان کیا گیا ہے۔

ریاستی موسمیاتی مرکز کے ایک سائنسدان روہت تھپلیال نے کہا کہ مانسون اتراکھنڈ کے بقیہ حصوں اور شمال مغربی ہندوستان کی دیگر ریاستوں میں اگلے دو سے تین دنوں میں پوری طرح سے سرگرم ہو جائے گا۔ ریاستی ڈیزاسٹر مینجمنٹ اتھارٹی نے اضلاع کو چوکس رہنے کا مشورہ دیا ہے اور چاردھام یاتریوں سے سفر کے دوران موسم کی نگرانی کرنے کی اپیل کی ہے۔ لوگوں کو دریاو¿ں اور ندی نالوں سے دور رہنے کی تاکید کی گئی ہے۔

رودرپریاگ ضلع میں سون پریاگ-منکٹیہ کے درمیان کیدارناتھ پیدل یاتراراستہ آج صبح پہاڑی سے چٹان گرنے کی وجہ سے بند ہوگیا، جس کی وجہ سے احتیاطی اقدام کے طور پر پیدل چلنے والوں کی نقل و حرکت کو عارضی طور پر روک دیا گیا۔

ضلع انتظامیہ کے مطابق صبح:44 9 بجے سیکٹر آفیسر سونپریاگ نے منکٹیہ علاقے میں چٹان گرنے کی اطلاع دی۔ مسافروں اور یاتریوں کی حفاظت کے لیے انتظامیہ نے فوری طور پر روٹ پر ٹریفک روک دی۔

ضلع ڈیزاسٹر منیجمنٹ آفیسر نندن سنگھ راجوار نے بتایا کہ سڑک کو جلد فعال بنانے کے لیے متعلقہ محکمے کی ٹیمیں جے سی بی مشینوں سے ملبہ اور بڑے پتھروں کو ہٹانے کے لیے جنگی بنیادوں پر کام کر رہی ہیں۔

انہوں نے کہا کہ اس راستے کو مکمل طور پر محفوظ قرار دینے کے بعد ہی ٹریفک بحال کی جائے گی۔ انتظامیہ نے یاتریوں سے اپیل کی ہے کہ وہ ہدایات پر عمل کریں اور روٹ کے دوبارہ کھلنے کی باضابطہ اطلاع موصول ہونے تک انتظار کریں۔

---------------

ہندوستان سماچار / عبدالسلام صدیقی