نئی دہلی، 17 جولائی (ہ س)۔

صدرجمہوریہ دروپدی مرمو 19 سے 25 جولائی تک مالدووا، شمالی مقدونیہ اور رومانیہ کے سرکاری دورے پر ہوں گی۔ اس دورے کے دوران وہ تینوں ممالک کی اعلیٰ قیادت کے ساتھ دو طرفہ بات چیت کریں گی اور تجارت، سرمایہ کاری اور مختلف شعبوں میں تعاون بڑھانے پر تبادلہ خیال کریں گی۔

وزارت خارجہ نے جمعہ کو بتایا کہ صدرجمہوریہ مرمو صدر میا سینڈو کی دعوت پر 20 جولائی کو مالدووا پہنچیں گی۔ یہ کسی ہندوستانی صدر کا مالدووا کا پہلا دورہ ہوگا۔ دورے کے دوران صدر اپنی ہم منصب میا سینڈو کے ساتھ وفود کی سطح پر بات چیت کریں گی۔ وہ مالدووین پارلیمنٹ کے سپیکر ایگور گروسو سے بھی ملاقات کریں گی۔ صدر مالدووا-انڈیا پارلیمانی فرینڈشپ گروپ کے ارکان سے بات چیت کریں گی۔ وہ انڈیا-مالدووا بزنس فورم سے بھی خطاب کریں گی اور ہندوستانی کمیونٹی کے اراکین سے ملاقات کریں گی۔

وزارت کے مطابق، ہندوستان اور مالدووا کے درمیان دوستانہ تعلقات ہیں۔ یہ دورہ دونوں ممالک کے درمیان تعلقات کو ایک جامع شراکت داری کی طرف بلند کرنے کی جانب ایک تاریخی قدم ہو گا۔

وزارت خارجہ نے کہا کہ رومانیہ یوروپی یونین میں ہندوستان کا ایک اہم شراکت دار ہے اور ہندوستان-یورپی یونین کے آزاد تجارتی معاہدے کی تکمیل کے بعد دونوں ممالک کے درمیان اقتصادی تعلقات مزید مضبوط ہونے کی امید ہے۔

وزارت کے مطابق، ان تینوں ممالک کے صدر کے ریاستی دورے مشرقی یوروپی خطے کے ساتھ ہندوستان کی بڑھتی ہوئی مصروفیت اور ان ممالک کے ساتھ دو طرفہ تعلقات کو مزید مستحکم کرنے کے ہندوستان کے عزم کی عکاسی کرتے ہیں۔

ہندوستھان سماچار

ہندوستان سماچار / عطاءاللہ